Albin Kurti, u takuan me Komisionerin e Bashkimit Evropian për Buxhet dhe Administratë, Johannes Hahn, në ditën e parë të pjesëmarrjes në Konferencën e Sigurisë së Mynihut. Me anë të një komunikate për media, kryeministria bën me dije se përgjatë takimit u diskutua çështja e punësimit të të rinjve përmes sistemit dual të arsimimit dhe angazhimit profesional. Kurti ka qenë i shoqëruar nga ministrja e Punëve të Jashtme dhe Diasporës, Donika Gërvalla.
“Një nga dy prioritetet kryesore të qeverisë është punësimi, sidomos i të rinjve dhe grave. Përveç investimeve të huaja, ulja e papunësisë te të rinjtë duhet të trajtohet edhe nëpërmjet reformave në sistemin e arsimit. Prandaj, edhe synim e tashmë edhe veprim i yni është zhvillimi i një sistemi dual të edukimit që do të mundësonte lidhje ndërmjet tregut të punës dhe sistemit arsimor” – mësohet të ketë thenë Kurti.
Më tej, siç njofton kryeministria, kreu i ekzekutivit kosovar i tha Hahnit se Kosovës duhet t’i liberalizohen vizat.
“Sa i përket liberalizimit të vizave, kryeministri Kurti përsëriti faktin, që edhe është evidentuar tashmë në raportin e Komisionit Evropian, se Kosova ka plotësuar kriteret për liberalizimin e vizave. Mos liberalizimi tanimë është e drejtë e mohuar. Ndërkaq, komisioneri Hahn tha se Bashkimi Evropian, përveç tjerash do të përkrahë teknikisht dhe financiarisht në projektet për arsim dhe aftësim profesional” – thotë kryeministria.
