Çdo ditë të orës dhjetë hapet pazari për t’u mbyllur në orët e vona të natës. Deputetët janë gati me telefon hapur për të pritur ofertën e radhës. Në rast se ndonjërit i gjendet telefoni mbyllur do të thotë se e ka mbyllur pazarin. Kurrë nuk kanë qenë më të rëndësishëm se kaq. Ne mund të mos i njohim fare disa prej tyre, por këto ditë ata janë më të rëndësishmit për liderët e partive. Fundja për një ditë si kjo iu duhet mandati. Ndërkohë udhëheqësit janë në gatishmëri numër një dhe me oferta, të cilat sa vijnë e rriten. Beteja është zhvillohet në dy fronte, për të plotësuar numrin 94 për reformën në drejtësi dhe numrin 71 për të bërë qeverinë.
Ajo që duket interesante është se njëri prej aktorëve kryesorë në këtë pazar të gjësë, Edi Rama flet me siguri se i ka 94 votat për reformën në drejtësi, por ndërkohë është duke kërkuar për të plotësuar 71 vota për të mbajtur në këmbë qeverinë në çdo rast, kur zhvillimet politike mund të marrin drejtimin që ai nuk do të donte. Mund të jetë një version i padëshiruar si për shembull nëse Meta mund të jetë shumë, po shumë i vendosur të respektojë atë që e ka deklaruar që në fillim që pa konsensus kjo reformë në drejtësi, nuk mund të miratohet. Dhe ja ku mund të gjendemi në një situatë, kur 94 votat nuk i bëjnë punë Ramës dhe do të vazhdojë betejën për 71 vota. Paradoks kjo përpjekeje e kryeminsitrit që e paska aq të thjeshtë të bëjë 94 e jo 71 vota. Le të presim e të shohim se si Rama do ta zgjidhë këtë problem të madh me shifrat e ngatërruara të këtij tregu të radhës në politikën shqiptare.
