Presidenti serb Aleksandar Vuçiç do të vizitojë veriun e Kosovës në fundjavë. Kreu i shtetit serb do të zhvillojë bisedime me serbët e Mitrovicës e Graçanicës për një sërë temash të ndryshme, përfshi edhe vrasjen e bujshme të politikanit serb Oliver Ivanoviç, një ditë më parë.
Ngjarja shkaktoi reagime të menjëhershme dhe çoi në pezullimin e dialogut dypalësh Kosovë-Serbi që zhvillohej me ndërmjetësimin e Bashkimit Europian në Bruksel, por mesa duket Vuçiç e ka rimenduar situatën.
“Sipas kërkesës, që është parashtruar nga Presidenti i Serbisë ndaj Institucioneve të Republikës së Kosovës për vizitë në Kosovë, ne i kemi dhënë leje për këtë vizitë dhe presim që ai të sillet mirë dhe të respektojë rregullat e lejes gjatë qëndrimit në Republikën e Kosovës”, ka thënë Jetlir Zyberaj, Shef i Kabinetit dhe Këshilltari Lartë i Zv/Kryeministrit dhe Ministri i Jashtëm, Behgjet Pacolli.
