Kryeministri Edi Rama ka zgjedhur tu thotë mirëmëngjesi të gjithë miqve të tij në rrjetin social Facebook me një artikull të publikuar në mediat italiane për Syrin e Kaltër.
Por shumë komentues i kanë shkruar për pakënaqësitë dhe ato që kanë parë me sytë e tyre. “Vetëm këtë nuk duhet ta kishe bërë. Isha jo më larg se dy javë më parë në këtë vend, çfarë të shikoje?! Trafiku ishte katastrofë duhej një orë që të shkoje te burimi, rruga e shkatërruar si mos më keq, mbeturina ngado që hidhje sytë, era e qofteve të mbyste, ferrat kishin mbuluar çdo gjë, për të shkuar te burimi duhet të kaloje mbi mbeturina dhe ferra, një çorganizim total. Atje duhet të vini dorë patjetër pasi ata vizitorë që kanë qenë këtë vit janë tmerruar nga ajo pamje e shëmtuar e një mrekullie siç e cilëson shkrimi më sipër”, shkruan një ndër komentuesit.
Sakaq, ajo që bie në sy sot tek komentuesit e Ramës, është rasti i kryeinfermieres së Shërbimit Onkologjik në QSUT, e cila i është drejtuar me një letër Kryeministrit Rama për vendin e saj të punes që thote se ia kanë blerë dhe atë e kanë lenë thjesht një infermiere, pas 12 vitesh pune në këtë post.
Letra:
Përshëndetje zoti Kryeministër! Unë quhem Blerina Cenameri, kam 12 vjet që punoj në spitalin Onkologjik, kryeinfermiere. Kam mbaruar shkollën për infermieri në vitin 2002, dhe po këtë vit nisa punë. Si fillim nisa punë si infermiere ne reanimacion neurokirurgji. Kjo detyre m’u dha për shkak të mesatares së lartë që kisha në shkollë. Pas një konkurimi për infermieret u vendosa kryeinfermiere në Kirurgjinë e Përgjithshme. Pasi punova aty një vit, u bë një tjetër konkurim dhe u vendosa në Spitalin Onkologjik. Që atëherë kam punuar kryeinfermiere tek Onkologjiku deri në dhjetor të 2016 kur çuditërisht suprimohet vendi im i punës dhe kaloj infermiere.
Kjo gjë ndodhi vetëm në shërbimin Onkologjik, në asnjë vend tjetër në QSUT. Arsyeja që më dhanë nga drejtoria ishte suprimimi i vendit të punës. Për 11 vite kam punuar me përkushtim e ndërgjegje, pa asnjë vërejtje, kontrollet nuk më kanë gjetur asnjëherë në gabim, por puna ime jepej si shembull.
Ne 8 korrik 2017, në vendin që unë lashë, u emërua një kryeinfermiere tjetër. E shikoj një gjë të padrejte, nuk e shoh aspak të arsyeshme që një person i specializuar, me CV të pasur, të zëvendesohet me një shkak banal, dhe gënjeshtra.
Gjatë kësaj periudhe kam bërë dhe kërkesë tek Drejtoria e Burimeve Njerëzore nëse hapej ndonjë vend si kryeinfermiere në Sherbimin Onkologjik meqenëse isha e specializar në ketë spital.
Unë mendoj se nëse do ishte reformë, sic keni deklaruar ju se do të bëhet, do të ishte për të gjithë dhe jo për një individ. Kam kërkuar takime me drejtorin e QSUT Enkeleid Joti, por as më ka pritur, as mesazh nuk më ka kthyer.
Jam e aftë të konkurroj përsëri me CV time dhe me përgatitjet e mia, por nuk kam më besim se fiton aftësia. Nëse do kishte reformë për të gjithë do e quaja dicka të drejtë por kjo ndodhi vetëm tek unë.
E emëruara në vendin tim nuk ka eksperiencë në fushën e kirurgjisë. Kur unë ndërkohë kam shumë vite pune në kirurgji. Zoti kryeminister kërkoj drejtësi, puna e njerëzve të ndershëm dhe me eksperiencë nuk mund të hidhet poshtë me një reformë që duket absurde, pasi shkaku që mua më kanë dhënë për të më ulur në detyrë, është po ashtu absurd. Në vendin tim tani është një tjetër, por në një post që thuhet se është suprimuar…Nëse do të bësh shtet, eja nise nga vendi im i blerë i punës.
/Panorama.al/
