Ministri i Jashtëm i Greqisë Nikos Kotzias ka deklaruar se Greqia është shumë pranë arritjes së marrëveshjes Me Shqipërinë.
Kotzias këto deklarata i ka bërë në Oslo të Norvegjisë. Ai madje ka thënë se marrëveshja për rikonfigurimin e kufijve detarë po arrihet pas dekadash përpjekje duke e cilësuar si çështjen e detit si një shans të madh që po i vjen vendit të tij nga qeveria Rama, që në kohën e Enver Hoxhës.
Sipas Kotzias shumë shpejt pritet që të përfundojnë negociatat me Shqipërinë, ndërsa paketa e marrëveshjes sipas tij do të mbajë 10 pika.
“Përmes këtyre politikave të jashtme proaktive, ne jemi pranë zgjidhjes së problemeve të vjetra me Shqipërinë. Shumë shpejt, besoj, ne do t’i përfundojmë negociatat për një paketë me dhjetë çështje. Kjo paketë përfshin përcaktimin e kufijve dhe zonave detare, dhe kështu me radhë.
Çështja është që këto probleme me këto vende nuk u krijuan dhe u zgjidhën gjatë Luftës së Ftohtë, siç ndodhi në raste të tjera, si ato mes Polonisë dhe Gjermanisë. Përkundrazi, problemet që po i referohem kanë dalë pas përfundimit të Luftës së Ftohtë: Maqedonia e Veriut ishte pjesë e Jugosllavisë, prandaj nuk kishte ndonjë çështje për të njohur atë si një shtet. Shqipëria ishte nën regjimin izolacionist të Enver Hoxhës, kështu që nuk kishte shanse për të negociuar me të.
Prandaj, mendimi ynë ishte dhe ende është që t’i zgjidhim këto çështje duke marrë iniciativa. Sepse, ju e dini, kur ngec diplomacia, problemet nuk zgjidhen në kohë paqeje. Këto probleme zakonisht zgjidhen nëpërmjet luftës – të ftohtë ose ‘të nxehtë’ – dhe me një kosto shumë më të lartë”, ka thënë Kotzias./Faxweb
