Një 66 vjeçar është arrestuar nga Policia e Korçës pasi posedonte pa leje në banesë armë zjarri, pajisje shpërthyese dhe municione luftarake.
Arrestimi i 66 vjeçarit u bë pasi banorët njoftuan policinë se në fshatin Drenovë kishte konflikt në një familje dhe se i zoti i banesës posedonte armë zjarri.
Pasi ka shkuar policia, 66-vjeçari është vënë në pranga, gjatë momentit që ishte duke u konflituar me djalin e tij.
Njoftimi i plotë:
Shërbimet e Komisariatit të Policisë Korçë, pas marrjes së njoftimit se në fshatin Drenovë kishte konflikt në një familje, dhe se i zoti i banesës posedonte armë zjarri, kanë shkuar menjëherë në adresën e dhënë dhe falë veprimeve të shpejta parandaluan përshkallëzimin e konflikit që mund të sillte pasoja të rënda për jetën.
Policia ka arrestuar në flagrancë shtetasin P.Th., 66 vjeç, i cili po konfliktohej me djalin e tij.
Gjatë kontrollit në banesën e këtij shtetasi, Policia gjeti dhe sekuestroi në cilësinë e provës materiale një armë zjarri pushkë, municione luftarake, si edhe pajisje shpërthyese.
Materialet në ngarkim të tij, i kaluan Prokurorisë së Rrethit Gjyqësor Korçë, për veprat penale “Dhuna në familje” dhe “Prodhimi dhe mbajtja pa leje e armëve luftarake dhe e municionit”.
