Ish-deputeti Koço Kokëdhima akuzoi sot disa media pranë segmenteve të caktuara brenda PS-së se po e sulmojnë.
Kokëdhima ka reaguar sot pas disa raportimeve në media dhe një interviste të deputetit të PS, Fatmir Toçi, të cilët e akuzonin Kokëdhimën se po ngre struktura paralele në degët e PS në jug të vendit. Në këto raportime thuhej gjithashtu se Kokëdhima ishte pritur keq në mbledhjen e Asamblesë Socialiste të Vlorës.
Zyra e shtypit e ish-deputetit ka bërë për këtë rast deklaratën duke sqaruar edhe çfarë ka ndodhur në Asamblenë e PS Vlorë, ku kreu i FRESSH të këtij qyteti dhe 3 persona të tjerë janë larguar nga mbledhja.
“Media pranë segmenteve të caktuara brenda Partisë Socialiste kanë nisur ditët e fundit një sulm frontal kundër ish-deputetit Koço Kokëdhima. Fillimisht sulmet nisën me shkrime ku citoheshin burime anonime nga Delvina dhe sot kanë vijuar me krijimin e një skene teatrale në Asamblenë Socialiste të Vlorës duke thërritur edhe mediat që të jenë të pranishme. Në momentin që Kokëdhima ka marrë fjalën, kryetari i FRESSH të Vlorës, Klajdi Myzaferaj, njëkohësisht edhe Drejtori i Qendrës së Formimit Profesional në Vlorë, ka inskenuar largimin e tij dhe të tre vartësve të tij nga salla. Myzaferaj është shprehur se nuk dëshiron që të dëgjojë Kokëdhimën dhe ka kërkuar që edhe të pranishmit e tjerë të dalin nga salla. Por përveç tre vartësve të tij, asnjë person tjetër nuk ka dalë nga salla. Më pas Asambleja Socialiste e Vlorës ka vijuar punimet e saj normale me fjalën e Kokëdhimës”, thuhet në deklaratë.
