Një raport i Kongresit të Autoriteteve Lokale të Këshillit të Europës ben të ditur se ndarja territorial e 61 bashkive ka krijuar konfuzion dhe po zbatohet me ngadalësi. Misioni i KiE vizitoi Shqipërinë si pjesë e vëzhgimit të zgjedhjeve vendore të 21 qershorit 2015.
Misioni i reporterëve u drejtua nga holandezi, Jos VVienen, zv.president i Komisionit Vëzhgues të Kongresit. Ai ka deklaruar se “konfuzioni në lidhje me kompetencat dhe burimet financiare ndjehet thuajse në të gjithë krerët e rinj vendor dhe kërcënon implementimin real dhe të shpejtë të reformës territoriale.
Ndërkaq, raporti është mjaft kritik në lidhje me alokimin e burimeve financiare në mbështetje të reformës. Ndërkohë që qeveria ka alokuar 3.2 për qind të GDB-së në 2016 për qveritë vendore dhe që është niveli më i lartë i dhënë ndonjëherë, gjithsesi kjo cilësohet e pamjaftueshme.
“Kompetencat e reja dhe struktura e re administrative nuk i përgjigjet fondeve të përcaktuara në buxhetin e vitit 2016”, theksohet në raport.
Ndërkaq, një pikë e rëndësihme është ajo që cilësohet preference e shpërndarjes së granteve dhe prokurimeve.
“Transparenca e granteve dhe tenderave ka krijuar shqetësime, pasi Fondi i Zhvillimit Rajonal është i menazhuar nga qeveria qendrore dhe ka ndjekur një politikë të favorizimit politik”, thekson raporti.
Ai vë në dukje shqeësimet e opozitës në lidhje me njësitë e reja vendore që sipas saj janë kryer me qëllime elektorale.
“Disa njësi si në Shkodër dhe bashkinë e Tiranës janë ndarë pa një arsye të qartë empirike”, bëhet e ditur në raportin e Autoriteteve Lokale të Këshillit të Europës.
