Kryeministri Edi Rama propozoi që Këshilli Politik të mblidhej sot në orën 17:00.
Ndërkaq, ka ardhur përgjigja nga ana e opozitës. Përmes një e-maili, në emër të opozitës së bashkuar, Oerd Bylykbashi dhe Petrit Vasili kanë kërkuar që mbledhja të zhvillohet nesër në orën 17:00 ose të premten në orën 11:00, por sipas një agjende të ndryshuar, ku të diskutohen çështje si shitblerja e votës dhe presioni ndaj votuesve.
Kujtojmë se mbledhja e parë e Këshillit Politik që zgjati 5 orë, u bë pa praninë e Bashës dhe Metës dhe konkludoi pa një marrëveshje mes palëve.
Mbetet për t’u parë nëse këtë herë, krerët e lartë të politikës do t’i bashkohen tryezës së Këshillit sipas ftesës së Ramës, i cili nuk heq dorë nga listat e hapura, por nga ana tjetër as opozita nuk tërhiqet nga marrëveshja pa ndryshime e 5 qershorit.
E-MAIL I PLOTË:
Në vijim të email-it më poshtë, propozojmë që mbledhja e Këshillit Politik, është e përshtatshme, të zhvillohet të enjten në orën 17:00, ose të premten ora 11:00, sipas kohës tuaj.
Në Rendin e Ditës së mbledhjes siç kemi rënë dakord në Marrëveshjen e 5 Qershorit, duhet të përfshihet vijimi i punës së Këshillit për zbatimin e pikave 11 dhe 12 të saj, ku specifikohet se: “11. Masat shtesë: Këshilli Politik do të vazhdojë të diskutojë në mirëbesim dhe të përpiqet të arrijë zgjidhje të përbashkëta ku dhe kur është e mundur të adresohen rekomandimet kryesore të ODIHR lidhur me: (1) blerjen e votës; (2) presionin ndaj votuesve dhe administratës publike; (3) keqpërdorimin dhe abuzimin me administratën publike; (4) marrëveshjet e fshehta me grupet kriminale; (5) lirinë dhe sekretin e votës; dhe (6) manipulimin dhe falsifikimin e rezultateve zgjedhore. Në rast të mosprogresit këto propozime NUK do të ndërhyjnë apo vonojnë një marrëveshje dhe kalimin në parlament të masave të dakordësuara në pikat 1-9.
12. Hyrja në fuqi: Pikat 1, 2, 3, 7, 9, 9, 10 dhe 11 më sipër dhe dy shënimet poshtë do të hyjnë në fuqi për zgjedhjet e ardhshme (parlamentare dhe vendore). Pikat 4, 5 dhe 6 më sipër do të hyjnë në fuqi pas zgjedhjeve të ardhshme zgjedhore dhe parlamentare.”.
Në lidhje me ndryshimin e formatit të përbërjes së Këshillit Politik, nëse ju keni vlerësuar si të përshtatshme zgjerimin e përfaqësuesve të partive politike në Grupin e Punës së Këshillit Politik, atëherë ju bëjmë me dije se Opozita e Bashkuar do të përfaqësohet përveç nesh, edhe nga Sekretari i Përgjithshëm i Partisë Demokratike z. Gazment Bardhi.
Mbetemi në pritje të konfirmimit tuaj!
Oerd Bylykbashi
Petrit Vasili
