Mbledhja e Këshillit Politik do të mbahet të hënën në orën 11:00. Pas disa korrespondencave në distancë më në fund palët u morën vesh për orën dhe ditën e takimit për të diskutuar nga afër për ndryshimet kushtetuese dhe Marrëveshjen e 5 qershorit.
Opozita do të përfaqësohet në këtë tryezë nga Oerd Bylykbashi, Petrit Vasili dhe Gazment Bardhi.
Ndërsa nga Rilindja Edi Rama ka zgjedhur të shkojë vetë në mbledhje, i shoqëruar nga përfaqësuesi i përhershëm i shumicës, Damian Gjinkuri.
Opozita nuk tërhiqet nga Marrëveshja e 5 qershorit duke deklaruar se ajo duhet të miratohet sa më parë dhe pa asnjë ndryshim, madje paralajmëron se asnjë nga çështjet, për të cilat u ra dakord në këtë marrëveshje nuk do të rihapen në tryezën e radhës.
Nga ana saj Rilindja parashtroi në emailin zyrtar për përfaqësuesit e opozitës se në tryezë do të diskutohen edhe ndryshimet Kushtetuese të miratuara në Komisionin e Ligjeve, përfshirë këtu hapjen e listave dhe heqjen e koalicioneve parazgjedhore.
