Ministrja e mbrojtjes Mimi Kodheli, deputetja e PD-së Majlinda Bregu, shumë analistë, gazetarë e personalitete të tjera mbështesin ligjvënësen e Kuvendit të Shqipërisë përballë sulmeve të ekstremistëve sllavo–maqedonas.
Më qindra mesazhe mbështetëse ka marrë ligjvënësja e Kuvendit të Shqipërisë Mesila Doda, pas kërcënimeve që i erdhën nga ekstremistët sllavë të Maqedonisë.
27.al publikoi mjaft prej këtyre kërcënimeve që i kanë ardhur asaj nga ekstremistë sllavo-maqedonas, ndërsa Doda njihet si një ndër politikanet më aktive në mbrojtjen e të drejtave të shqiptarëve në Iliridë.
Pas mesazheve kërcënuese, Mesila Doda ka marrë me qindra mesazhe mbështetëse, ku vlerësohet shumë qëndrimi i saj në mbështetje të shqiptarëve të Maqedonisë e ku shumë komentues shprehen se janë gati ta mbrojnë me jetën e tyre. Ka komente nga njerëz të thjeshtë, por edhe nga personalitete publike, siç janë ministrja e Mbrojtjes Mimi Kodheli apo deputetja e PD-së Majlinda Bregu. Ka komente mbështetëse edhe nga analistë të shumtë, gazetarë e personalitete të fushave të ndryshme.
“Kush urren nuk e njeh Zotin. Mesila, ti je nga ato që jo vetëm e njeh Atë por e mban pranë. Këta që shkruajnë janë larg… shumë larg Tij”, shkruan Mimi Kodheli. “Çfarë s’të vret, të bën më të fortë, apo jo? Sa kohë kemi që po e provojmë këtë?” shkruan Majlinda Bregu. “Familja Doda ndër vite ka nxjerrë patriotë”, shkruan një komentues, ndërsa Ilir Hoxholli shpreh bindjen se deputetja nuk është trembur, por kërkon të sensibilizojë për urrejtjen që sllavo-maqedonasit kanë për shqiptarët: “Ngjarjet e fundit më bënë të kuptoj se nacionalistët maqedonas edhe po të rrish urtë nuk do reshtin t’i shkelin të drejtat e shqiptarve. Unë e di që nuk je e trembur, por thjesht doje të ndaje me ne kush janë ekstremistët maqedonas…”
