Mëngjesin e ditës së sotme është ndarë nga jeta ish-kryetari i Gjykatës së Lartë të kohës së komunizmit, Aranit Çela.
Çela njihej si “xhelat i regjimit” të asaj kohe, për shkak të ashpërsisë së vendimeve që ai ka marrë, ku nuk kanë munguar dënimet e forta deri në pushkatime apo torturat e shumta të ushtruara prej vartësve të tij.
Ai është ndarë nga jeta në moshën 98 vjeçare.
Njihej si votues dhe përkrahës i flaktë i Rilindjes.
Vdiq anëtari më i vjetër i Partisë së Punës
Kur ishte kryetar i Gjykatës së Lartë, Aranit Çela u tregonte me krenari e nënqeshje ironike gjyqtarëve të rinj, pjesë nga karriera e tij si prokuror ushtarak në Shkodër. Ai thoshte se sapo mbaronin gjyqet me vdekje, toga e ushtarëve i merrte të pandehurit dhe i pushkatonte, pa pritur vendimin e shkallës më të lartë. Ato vite, për ekzekutimet në Shkodër, vendimet e formës së prerë të Gjykatës së Lartë Ushtarake janë marrë dy javë pasi të dënuarit ishin ekzekutuar. Çela e tregonte me mburrje këtë veprim duke i mësuar të rinjtë se rëndësi kishte zhdukja e “armikut” sa më shpejt dhe jo të zbatoheshin procedurat gjyqësore siç ishin shkruar.
Çela u kthye në “vishinskin” e komunizmit të Shqipërisë, një figurë që mllefin klasor e shfaqte me nxjerrjen e shkumës nga goja. Ai mbeti një kombinim i shkëlqyer i ligësisë që e karakterizonte dhe shkollës sovjetike ku u plotësua juridikisht, për të qenë një vegël e verbër e pushtetit. Poshtëritë e krimet e këtij njeriu filluan në Shkodër, në qytetin më antikomunist e më të qytetëruar të Shqipërisë. Ai çoi në plumb ose u dha burg qindra personave të shkolluar, si përfaqësuesi më i denjë i pushtetit të injorantëve dhe kriminelëve. Përllogaritet pjesëmarrës si prokuror ose gjyqtar i lartë në të paktën 650 procese politike.
(Pritet që organizatat enveriste që fshihen pas maskave të “veteranëve”, të bëjnë përkushtimet e duhura ndaj këtij personi, veç atyre të varrimit).
Skeda e jetës së Aranit Çelës:
1924, 10 janar, lindi në Vlorë
1935-1942 mbaroi institutin tregtar në Vlorë
1939 (korrrik), balil fashist në Itali
1943 (nëntor)- 1944 (korrik), partizan në Grupin e III të Mallakastrës
1944 (korrik)-1945 (janar), zëvendëskomisar batalioni në Br. 16
1945 (janar-mars), shef i informacionit të Divizionit të 3-të
1945-shtator 1946, prokuror ushtarak në Shkodër
1946-1948, prokuror ushtarak në Korçë
1948-1949 ndihmësprokuror i Prokurorisë Ushtarake
1949-1953 diplomohet në Bashkimin Sovjetik
1953-1954 nënkryetar i Degës së Hetuesisë
1955 – 1958 kryetar i Gjykatës së Lartë
1958 – 1966 prokuror i përgjithshëm
1966 – 1990 kryetar i Gjykatës së Lartë
