Keni dëgjuar ndonjëherë për një bibliotekë shëtitëse? Epo, një e tillë po zhvillon turin e saj të dytë në qytetin e Lezhës.
Ky projekt nisi si një iniciative e bibliotekës së qytetit të Lezhës dhe drejtueses së saj Znj Suela Bala, me qëllimin për të lidhur më shumë nxënësit e shkollave me librin. Projekti konsiston në një makinë të përshtatur si bibliotekë, me librat e shumëllojshëm të vendosur në rafte si dhe me kartela të anëtarësimit. Një bibliotekë shëtitëse që i ofrohet nxënësve të shkollës nga cikli parashkollor e deri tek maturantët e sidomos atyre në zonat rurale, ku mundësitë janë më të pakta.
Biblioteka lëvizëse me një larmishmëri librash artistik dhe jo vetëm, nisi udhëtimin në zonat rurale të Lezhës e ka përshkruar plot 32 fshatra.
“ Kevin, 3 vjeçar në kopështin e fshatit Kodhel, kur shkuam vjet nuk fliste asnjë fjalë dhe nuk shoqërohej me askënd. U ula në tryezë me të duke shfletuar një libër me figura. Ai u afrua ngadalë dhe u ul në prehër pa folur asnjë fjalë. Kur e kuptoi që po iknim doli jashtë duke qarë, edukatorja vrapoi pas tij dhe unë ju afrova me shumë ndrojë. Ai mu hodh në krahë dhe nuk shkëputej. Këtë vit udhëtuam përsëri në fshatin Kodhel, Kevini kishte filluar të fliste dhe më tha “Paçim” duke më puthur me dorë. Ka qenë ngjarja më e bukur e udhëtimit tonë”, thotë drejtoresha e bibliotekës së qytetit dhe iniciatorja e këtij projekti.
Drejtoresha shënon dhe momente të tjera të bukura të bibliotekës shëtitëse si në fshatrat Ungrej dhe Kallmet, ku fëmijët nuk hezituan të ulen në dysheme për të shfletuar librat.
Por, biblioteka shëtitese nuk mbeti vetëm në kuadrin e një iniciative të mirë, pasi u vleresua me çmimin e parë në nivel kombëtar për praktikat më të mira të qeverisjes vendore. Një çmim jo vetëm inkurajues por dhe shpërblyes në para me 10 000 franga zviceriane që u përdor për blerjen e 1000 librave dhe një makinë-bibliotekë të përshtatur tërësisht me rafte tipike si në një bibliotekë.
Kështu u mbyll turi i parë i kësaj bibliotekë shëtitëse me një hark kohor 8 mujor (nëntor 2016-qershor 2017) duke qarkulluar në duart e nxënësve më shumë se 1700 libra. Turi i parë pati dhe kampionët e leximit, nxënësit e një klase në shkollën Bilisht të cilët lexuan 23 libra në muaj.
Turi i dytë i bibliotekës shëtitëse u hap këtë të hënë me të njëjtin qëllim, pasion e përkujdesje për të sjellë bibliotekën të nxënësi.
Biblioteka shëtitëse tashmë është një mision për të sjellë botën e librit në të gjitha format e tij te nxënësi i shkollës në çdo vend ku ai jeton dhe pavarësisht mundësive që i jepen.
/urbanus.al/
