Gent Strazimiri dhe deputetët e tjerë të PD-së të dhunshëm në protestë tek Parku i Liqenit
Një kaubojs i vërtetë, me kapele sherifash dhe allti në brez. Kështu është shfaqur deputeti demokrat Gent Strazimiri në protestën e sotme te Parku i Liqenit.
Një pamje e turpshme e Partisë Demokratike kjo e sotmja në protestë. Deputetët e PD-së janë vënë në krye të përplasjeve duke dhunuar me grushta e shqelma policët që ishin aty në zbatim të urdhrit për të mbrojtur parkun nga protestuesit.
Një shfaqje po kaq e dhunshme ishte edhe ajo e policëve të Bashkisë Kamëz, të cilët u kishin ardhur në ndihmë të deputetëve rrebelë Strazimiri, Paloka, Flamur Noka e të tjerë. Që në nisje të protestës deputetët e PD-së kanë provokuar tensionimin e situatës duke sulmuar policët që ishin ngarkuar të ruanin punimet e projektit të parkut të lojrave. Pavarësisht në se ka shkelje ligji ose jo tek ndërtimi i parkut, ajo që është shkelje ligji me siguri, është edhe dhuna e deputetëve të PD-së ndaj uniformave të policisë. Po kaq e rëndë është edhe përfshirja e policëve të Kamzës në protestën e dhunshme të PD-së. 
Të veshur si civilë, policët bashkiakë të Kamzës nuk i kanë kursyer aspak kolegët e tyre të Tiranës, të cilët të veshur me uniformë ishin në krye të detyrës duke zbatuar urdhrin që iu ishte dhënë. Megjithatë, ajo që e bën më të rëndë situatën, është fakti se kryetari i opozitës Lulzim Basha, është ulur në këtë nivel duke mbështetur dhunën e deputetëve Strazimiri, Paloka e Flamur Noka kundër policisë. Më keq akoma, Basha ka dalë në një tjetër protestë para komisariatit të policisë, në përkrahje të Ndriçim Babasit i cili gjithashtu ka ushtruar dhunë ndaj policëve.
Lulzim Basha ka konfirmuar kështu këtë politikë të nivelit të ulët të opozitës, ku një deputet i cili shfaqet me pistoletë në një protestë që presupozohet të jetë paqësore, ndërsa të tjerë deputetë dhunojnë pa mëshirë uniformat blu. Ndërkohë që e gjithë kjo konsumohet për një kauzë që nuk është aspak e PD, por e qytetarvëe të Tiranës, e nisur nga pjesëtarë të shoqërisë civile.
