Nga Luljeta Progni
Kryetari i Partisë Demokratike duhet të qartësojë me urgjencë qëndrimin e tij për Reformën në Drejtësi. Pa asnjë hezitim duhet të lërë mënjanë politikën dredharake të gjetjes së kauzave boshe për t’iu shmangur reformës. Nga Shtetet e Bashkuara të Amerikës, Basha dha garanci se opozita do ta votojë Reformën në Drejtësi dhe Byronë Kombëtare të Hetimit sipas rekomandimeve të Komisionit të Venecias. Drafti i reformës është tashmë sipas kërkesave të opozitës bazuar në rekomandimet e Venecias. Ajo që pritet nga Basha dhe opozita është vetëm miratimi me urgjencë i saj. Në të kundërt opozita merr përsipër përgjegjësi që ndoshta nuk i takojnë. Nëse kjo bëhet vetëm për të shpëtuar një, dy apo disa njerëz të implikuar në korrupsion, atëherë kjo opozitë është e dënuar të mbetet po aq pis sa duket të jetë mazhoranca me deputetët e saj të inkriminuar dhe qeveritarët e korruptuar.
Kauzat e rreme të opozitës nuk mund të justifikojnë më qëndrimin larg Parlamentit e larg konsensusit për Reformën në Drejtësi dhe Byronë Kombëtare të Hetimit. Nëse versioni i Reformës në Drejtësi dhe ai i Byrosë së Hetimit janë afruar me propozimet e opozitës të bazuara tek komisioni i Venecias, tani nuk ka më asnjë kauzë që e mban peng votën e opozitës për Reformën në Drejtësi.
Nuk e justifikon aspak qëndrimin e opozitës kushtëzimi për heqjen e mandateve të dy deputetëve Valentina Leskaj e Rakip Suli. Kjo për shkak që nëse miratohet Byroja Kombëtare e Hetimit dhe nëse ajo do të funksionojë sipas modelit, për të cilin foli ambasadori amerikan, me siguri që do të qartësohet edhe implikimi i mundshëm i dy deputetëve të mazhorancës në përfitimin e fondeve publike.
Supozohet se Byroja Kombëtare e Hetimit do të ketë objekt të saj korrupsionin në nivelet e larta dhe patjetër që pjesë e shqyrtimit do të jenë edhe mandatet e këtyre dy deputetëve. Ndërkohë Reforma në Drejtësi është një kauzë më e madhe se mandati i dy deputetëve, të cilët akuzohen për abuzime me fondet publike. Në Kuvend, në krye të bashkive, në administratë ka plot persona të lidhur me krimin. Ky kontigjent krimi i instaluar në nivelet më të larta të shtetit rrezikon seriozisht ekzistencën e demokracisë në Shqipëri. Nëse opozita e ka seriozisht shqetësimin e saj për cënimin e demokracisë nga kjo shumicë, duhet të nxitojë për të miratuar Reformën në Drejtësi.
Aq më pak mund të konsiderohet si një kauzë për të bllokuar Reformën në Drejtësi, aksioni i opozitës për të ndalur projektin e ndërtimit të këndit të lojrave tek Parku i Liqenit. Ajo është një çështje e shoqërisë civile, të cilën opozita më së shumti mund ta mbështesë, por jo ta bëjë të veten e të bllokojë gjithë politikën e ditës tek ky aksion.
Nuk ka më asnjë argument që PD të hezitojë. Nëse nuk do të gjejë udhën për të shkuar drejt votimit, njolla do t’i mbetet PD-së dhe aq më keq nëse ka një marrëveshje me mazhorancën apo pjesë të saj për ta mbajtur peng reformën dhe Byronë e Hetimit. Nëse Basha vazhdon t’i bindet Berishës në këtë rrugë e ka të sigurtë dështimin, kurse PD ka të sigurt kthimin plotësisht në një OJQ të dobët e pa asnjë influencë.
