Fifa ka nisur një hetim ndaj Juventusit pasi dyshohet të ketë pa rregullësi në transferimin e Paul Pogbas nga “Zonja e Vjetër” tek Manchester United verën e vitit të kaluar. I përfshirë në hetim do të jetë edhe agjenti i lojtarit, Mino Raiola.
“Është e vërtetë, por nuk mund të japim detaje të tjera, vetëm mund t’iu konfirmojmë se nuk ka nisur asnjë hetim për Manchester Unitedin”, mësohet të ketë thënë zëdhënës i qeverisë botërore të futbollit për “ESPN”.
Nëse arrihet në konkluzionin se klubi bardhezi ka pjesë të përgjegjësisë, atëherë kampionët e Italisë rrezikojnë nga masa administrative e deri tek bllokimi i sesionit të ardhshëm të merkatos. Kujtojmë që vendime për bllokimin e një hapësire të shit-blerjeve janë marrë në të shkuarën për klube të tjerë mjaft të njohur si Real Madridi, Barcelona apo edhe Atletico, megjithëse për arsye të tjera.
