Ambasadorja amerikane në Kombet e Bashkuara, Nikki Haley tha se vendi i saj do të marrë shënim emrat e shteteve që do të votojnë kundër shpalljes së Jeruzalemit kryeqytet i Izraelit, ndërsa Presidenti i Shtetet e Bashkuara, Donald Trump, nëpërmjet ambasadores së tij në OKB, thotë që do të shkurtojnë financimet për ato vende që dalin kundër vullnetit të Uashingtonit.
Shqipëria nuk dihet deri tani se si do të votojë, sepse ministri i Jashtëm, Ditmir Bushati ka heshtur, ndoshta për vendimin më të vështirë që nga koha tek drejton diplomacinë në Tiranë.
Shqipëria mori pjesë në Konferencën Islamike të thirrur në Stamboll, ndërsa Bushati u shpreh se qëndrimi refuzues ndaj Amerikës në kryeqytetin turk është në koherencë me Bashkimin Europian.
Pas kësaj konference Presidenti Erdogan shkoi më tej, kur kërkoi që Jeruzalemi lindor të jetë kryeqytet i Palestinës.
Por, me këtë qëndrim të Shtëpisë së Bardhë raporti i shteteve me Uashingtonin zyrtar për këtë vendim kaq të rëndësëishëm është tek e tek dhe jo në grup. Tirana zyrtare nuk fshihet dot në këtë rast as pas Konferencës Islamike, as pas Bashkimit Europian.
Shqipëria duhet të marrë një vendim; pro ose kundër. Nëse voton pro fiton jo vetëm simpatinë e Shteteve të Bashkuara, por dhe financimet që zoti Trump thotë që kanë qenë miliarda jashtë Amerike. Por, fiton “armiqësinë” e Brukselit dhe mbi të gjitha të botës islame që udhëhiqet nga Erdogan, miku personal i kryeministrit Edi Rama.
Nëse voton kundër Shqipëria duhet të bëjë llogaritë me Shtëpinë e bardhë dhe jo vetëm me ambasadorin Lu.
Askush nuk do të dëshironte që sot për këtë vendim të ishte në lëkurën e Ditmir Bushatit dhe aq më shumë të shefit të tij Edi Rama.
/27.al/
