Në orët para të mëngjesit të sotëm kryeministri italian Matteo Renzi ka mbledhur me urgjencë ministrat e qeverisë së tij pas rezultatit të Referendumit në Britaninë e Madhe për daljen e saj nga Bashkimi Europian .
Në mbledhje i pranishëm ishte edhe Guvernatori i Bankës Italiane Ignazio Visco.
Sandro Gozzi , sekretari i shtetit në qeverinë Renzi për Çështjet Europiane u shpreh se: “Është një shok politik, një lajm mjaft i keq për të gjthë ne, që na çon drejt të së panjohurës. Proçedura e daljes së Britanisë së madhe nga BE mund të zgjas maksimumi 2 vjet dhe është në interesin tonë që kjo dalje të jetë sa më shpejt e qartë e me zgjidhjet më të mira të mundshme. Nuk duam të ecim përpara në paqartësi.”
Lideri i “Lidhjes së Veriut” Matteo Salvini është nga të parët politikan që ka komenutar në profilin e tij zyrtar në rrjetet sociale, “Tani na takon ne. Faleminderit UK. Rroftë kurajo e qytetarëve të lirë. Zemra, truri e krenaria i mundën gënjeshtrat, kërcënimet e shantazhet.”
Enrico Letta, ish kryeministri italian në profilin e tij në Twitter e ka komentuar rezultatin e këtij referendumi duke u shprehur; “Kanë zgjedhur e duhet ta pranojmë. Është koha që liderët europian të reagojnë në lartësinë e kësaj sfide historike të Brexit.”
Ndërsa, nënpresidenti i Parlamentit Europian italiani Antonio Tajani ka pohuar: “Janë bërë shumë gabime. Europa është e përbërë nga njerëz e jo vetëm nga monedha. Duhet një Europë më pranë qytetarëve. Duhet të ndryshohet drejtim.”
