Drejtori ekzekutiv i Lëvizjes Europiane në Shqipëri, Gledis Gjipali, ka folur sot gjatë një interviste televizive për procesin e integrimit. Gjipali tha se bllokimi i integrimit ka dëmtuar imazhin e BE-së. Më tutje, ai tha se presioni ndaj Bullgarisë për të hequr veton është shtuar, por prap nuk shihet ndonjë ndryshim për hapa para në këtë proces për vendin tonë.
Sakaq, ai tha se fillimisht u mendua që lufta në Ukrainë do të nxiste nevojnë për përshpejtimin e procesit të integrimit për vendet e Ballkanit, por në fakt nuk po ndodh kështu. “Presioni ndaj Bullgarisë po rritet, por gjithsesi deri më sot po shohim që jemi në të njëjtat pozicione. Nuk ka ndryshuar asgjë edhe pse menduam se lufta në Ukrainë do të sillte një ridimensionim të qëndrimit të BE-së, por edhe vendeve anëtare specifikisht sa i përket integrimit. Për fat të keq kjo gjë nuk po shihet te Bullgaria, e cila nuk ndryshon nga kursi i saj. Kjo vjen edhe për shkak të politikave të brendshme në Bullgari. Mendoj që është bërë një dëm i mjaftueshëm tashmë ndaj imazhit të BE-së dhe ndaj vendeve anëtare me qëndrimet e tilla që po pengojnë të gjithë procesin e zgjerimit, pasi vonesat janë zinxhir”, u shpreh ai.
Sakaq, ai tha se në këto kushte që Ballkani është në rrezik, BE nuk duhet të vonojë më shumë negociatat.
