Një rast i ri me koronavirus është shfaqur ditën e sotme në Bulqizë. Mësohet se i infektuari është pjesë e stafit të Njësisë Vendore të Kujdesit Shëndetësor Bulqizë.
Sakaq, ky institucion shërbimi mjekësor është mbyllur dhe ambientet e tij i janë nënshtruar dezinfektimit. Qytetarët e Bulqizës, të cilët kanë dashur të marrin shërbim pranë këtij institucioni ditën e sotme, i kanë gjetur dyert e mbyllura pasi i gjithë stafi është vetëkarantinuar. Atyre u është marrë edhe tamponi.
Situata së fundmi paraqitet kritike në vendin tonë, pasi kurba e infeksioneve dhe viktimave është rritur ndjeshëm. Gjatë 24 orëve të fundit në vendin tonë janë shënuar 3 viktima dhe 71 raste të reja me Covid-19.
Ndarja gjeografike e 10 rasteve në Qarkun Dibër është Mati 6, Dibra 3 dhe Bulqiza 1.
