Ipeshkvijtë e Shqipërisë mbajnë qëndrim për gjendjen e Kukësit, pas protestave të ditëve të fundit për taksën e Rrugës së Kombit.
Në një deklaratë të djeshme për shtyp – “me shpresë se do të japim kontributin tonë si pjesëmarrës në jetën sociale dhe shpirtërore të vendit”, siç shkruajnë – ata mbështesin “çdo nismë civile që kërkon të drejtat e patjetërsueshme të qytetarëve”; dënojnë “si moralisht të papranueshme çdo sjellje dhune ndaj personave, institucioneve, objekteve private apo shtetërore”, duke theksuar se “dhuna nuk është kurrë zgjidhje” dhe u bëjnë thirrje “institucioneve shtetërore të gjejnë rrugët e duhura për t’u ardhur në ndihmë personave në nevojë”.
Për këtë deklaratë zyrtare të tyre, intervistuam telefonikisht Sekretarin e Konferencës Ipeshkvnore të Shqipërisë, imzot Gjergj Metën, ipeshkvin e Rrëshenit, i cili, së pari, sqaron gjendjen, që i nxiti ipeshkvijtë të prononcohen…
“Konferenca e Ipeshkëvinjve të Shqipërisë, duke dashur të japë kontributin e saj ka mbështetur protestën e banorëve të Kukësit, por nga ana tjetër e kemi dënuar si të papranueshme çdo shprehje dhune kundër personave dhe objekteve,”, thotë ai.
