Kryetari i Kuvendit ka kërkuar që negociata për gjetjen e kompromisit të kryehet jo vetëm nga Lulzim Basha dhe Edi Rama, por të zhvillohet në Kuvend, ku ai si kryetar Kuvendi të jetë pjesë e tryezës, së bashku me ambasadorin amerikan Donald Lu dhe ambasadoren e BE-së Romana Vllahutin. Meta thotë që nëse kjo tryezë dështon atëherë të pestë anëtarët e saj duhet të largohen nga politika dhe diplomacia.
Ai thotë se 20 votat e LSI-së janë për reformën në drejtësi, por duhet gjetur marrëveshja me opozitën.
Në mënyrë pak të shpjegueshme, Ilir Meta shkon më tej, tek thotë që fill pas aprovimit të reformës të enjten, të rrëzohet qeveria. Ai shton që një qeveri ekspertësh ta çojë vendin në zgjedhje të parakohshme.
Këto zgjedhje të parakohshme mbeten enigmë pa reformën zgjedhore dhe cilët do të jenë ata që do ta bëjnë këtë reformë?
Ilir Meta thotë se nuk gjendet marrëveshje duke e nisur negociatën me fjalën “burg”. Ai u shpreh që vetë atë e kanë përfolur për burg, ndaj thotë se është i gatshëm ta bëjë burgun për të gjithë klasën politike shqiptare, qoftë edhe në Uashington apo Alaskë.
Pas netësh pa gjumë, kryetari i Kuvendit bëri propozimin e tij, tash priten reagimet e qeverisë dhe opozitës, së bashku me diplomatët e huaj.
