Kryeparlamentari Ilir Meta ka dalë në një konferencë për shtyp, për të folur mbi përplasjen e kryeprokurorit Adriatik Llalla me ambasadorin Donald Lu.
Meta ka thënë se, lidhur me kandidaturat e Prokurorisë për Komisionin e Emërimeve të Drejtësisë, ato kanë qenë më të mirat, pasi ishin të vetmet që plotësonin kriteret.
Ai tha që Prokuroria dhe Adriatik Llalla kanë zbatuar ligjin në mënyrë korrekte për këto emërime.
Ndryshe nga pretendimet e ambasadorit amerikan, se Prokuroria e Përgjithshme ka kryer shkelje duke përcjellë vetëm 3 kandidatë nga 9 që duheshin, Meta ka theksuar se, pasi është konsultuar me dokumentet e ofruara nga prokuroria me kërkesë të tij, ka konstatuar vetëm 3 nga kandidaturat e paraqitura plotësonin kriteret për të marrë pjesë në short, i cili, siç tha ai, u krye në mënyrë transparente.
“Nga kandidaturat plotësonin kriteret vetëm një nga propozimet e Prokurorisë së Përgjithshme dhe vetëm dy nga propozimet e prokurorive të apelit në qarqe. Nuk ka patur asnjë prokuror tjetër që të kishte mbaruar shkollën e Magjistraturës. Prokuroria e Përgjithshme rezulton se ka zbatuar në mënyrë korrekte e transparente Kushtetutën dhe ligjin për organet e qeverisjes së sistemit të drejtësisë, miratuar nga Kuvendi dhe hartuar me asistencën e BE dhe SHBA”, deklaroi Meta.
Në vijim të qëndrimit të tij, Meta ka theksuar se, në përfundim të procesit të përzgjedhjes asnjë prokuror nuk është ankuar as në Prokurorinë e Përgjithshme, as në Kuvend dhe as publikisht.
Deklarata e Metës:
Nisur nga deklaratat e bëra dje nga ambasadori i SHBA në Tiranë, Donald Lu për prokurorin e përgjithshëm Adriatik Llalla në lidhje me listën e kandidatëve të përcjellë për t’u përfshirë në shortin e KED-sit, me kërkesën time, sekretari i përgjithshëm i Kuvendit ka kërkuar sqarime shtesë për plotësimin e kritereve e kushteve ligjore për këta kandidatë.
Në përgjigje të kësaj shkrese, Prokurori i Përgjithshëm ka kthyer përgjigje zyrtare në datën 3 shkurt 2017. Sipas deklarimeve të djeshme të ambasadorit Lu prokuroria ka dhunuar frymën e Kushtetutës duke sjellë 3 kandidatë për tre pozicionet. Gjithashtu, Lu është shprehur se Prokuroria e Përgjithshme i zgjodhi vetë tre anëtarët duke zgjedhur vetëm tre emra.
Sqarojmë se Kushtetuta në pikën 3 përcakton se KED-si përbëhet nga nëntë anëtarë.
Në pikën dy të këtij neni përcaktohet se kandidatët që nuk plotësojnë kushtet, përjashtohen nga shorti. Sipas shkresës së datës 19 janar 2017 dhe shkresën e datës 3 shkurt 2017, rezulton se kandidatët e përcjellë plotësojnë kriteret e kushtet në mënyrë të plotë siç ka vendosur Kuvendi për ligjin e “Organeve të Drejtësisë” të asistuar edhe nga partnerët ndërkombëtarë.
Për këto vende plotësojnë kushtet vetëm dy prokurorë.
Sipas shkresës së sotme të Prokurorisë së Përgjithshme, në Prokurorinë e Përgjithshme nuk ka pasur asnjë prokuror tjetër që të kishte mbaruar Magjistraturën. Si edhe në prokurori të Apeleve nuk ka pasur asnjë prokuror që të plotësonte kriterin e mësipërm. Në këtë shkresë specifikohet se nuk ka pasur asnjë rast të uljes në detyrë të prokurorëve që kanë mbaruar Magjistraturën.
Bazuar në këtë informacion rezulton se Prokuroria e Përgjithshme ka zbatuar Kushtetutën. Asnjë prokuror nuk është ankuar as në Prokurorinë e Përgjithshme dhe as në Kuvend, apo publikisht lidhur me listën e kandidatëve të përcjellë nga ky institucion në Kuvend për shortin.
/gazetatema.net/
