“E ke nisur mbrapsht, shumë keq. Na ke folur për mungesën e etikës, për një politikë ndryshe, e nise duke etiketuar një zonjë, nuk duhet ta bësh. .. Bëj partinë tënde politike, me PDIU do të shihemi në zgjedhje dhe atje do të shohim sa vlen”
Një përgjigje e ashpër erdhi sot nga kryetari i PDIU-së, Shpëtim Idrizi, ndaj deputetit Ben Blushi, i cili kishte bërë disa deklarata jo etike ndaj deputetes Doda dhe PDIU-së. Idrizi i është përgjigjur Blushit për këto deklarata duke i kujtuar se e ka nisur keq politikën e re, me atë sjellje, kundër të cilës bën propagandë në foltoren e Kuvendit.
“Kolegu im Blushi fatkeqësisht e ka filluar keq politikën e tij të re. Zoti Blushi ne nuk i kishim 28 votat që të bënim dhe të kërkonim amendim kushtetues. Ne i jemi drejtuar komisionit të reformës në drejtësi me opinionin tonë. Në radhë të parë për presidentin nga populli, ne kemi propozuar që pas dy votimeve të para që duhen 84 vota. Pas dy raundeve ne kemi kërkuar t’i drejtohemi popullit. Ju deklaruat që keni 10 firma dhe ja keni adresuar kujt? Zoti Blushi mos i mashtro shqiptarët me 10 vota nuk e çon dot kërrkund, të duhen minimalisht 28 vota. Zoti Muhedini ta tha në këtë seancë që nuk është tek firmat e atyre 10 që ju pretendoni. Mashtroni se keni 9 firma dhe jo 10. E ke nisur mbrapsht, shumë keq. Na ke folur për mungesën e etikës, për një politikë ndryshe, e nise duke etiketuar një zonjë, nuk duhet ta bësh. Do të mirëprisja të dilje të kishe projektin tënd, të dilje përpara shqiptarëve, jo duke i futur thikën pas shpine partisë tënde. Bëj partinë tënde politike, me PDIU do të shihemi në zgjedhje dhe atje do të shohim sa vlen”, deklaroi Idrizi.
Në replikë me nënkryetarin e Kuvendit, Idrizi, deputeti Ben Blushi tha se nuk e pranon gjuhën vulgare, me të cilën i janë drejtuar deputetët e PDIU-së dhe kërkoi të mbyllet ky debat, duke kërcënuar.
“Për çfarë votoni ju për qeverinë apo opozitën me çfarë programi keni ardhur në pushtet? Unë jam në opozitë me çdo gjë që nuk me pëlqen në këtë vend. Me kërkoni ndjesë për gjuhën, këtë lloj gjuhe nuk ja pranoj askujt”, deklaroi Blushi.
Ndërsa Idrizi e kishte edhe nje ironi për propagandën e Blushit: Kam parë që u drejtohesh shqiptarëve të varfër. Më fal zt. Blushi, por besoj se je i fundit që mund t’u drejtohesh shqiptarëve të varfërve. Fakti që të treguam të gjithë ndryshimet tona, nuk kërkojmë që të japësh dorëheqje. E di pse, që të mos i lësh të varfrit vetëm sepse kanë shumë nevojë për ty, vetëm si të varfër nuk të kam parë apo mund të të shohin shqiptarët megjithëse për ty është bërë një film që kur ke qenë i vogël.
