Megjithë buzëqeshjet dhe dozat e optimizmit që po injektohet në publik nga Kongresi socialist, ka politikanë që nuk kanë dashur ta ndajnë këtë shfaqje me Edi Ramën.
Janë tre personalitete të njohur, të cilët kanë refuzuar të marrin pjesë në Kuvendin socialist.
Ish-kryetari Fatos Nano nuk ka preferuar që fundjavën ta kalojë në Pallatin e Kongreseve për t’u përshëndoshur me shokët e dikurshëm të betejave të së majtës, të cilët i kthyen shpinën sapo ra nga kali. Ka rënë në sy padyshim mungesa e Rexhep Meidanit, një nga të urtët e PS-së. Ky i fundit prej vitesh nuk ndan të njëjtat qëndrime me kreun Edi Rama dhe metodologjinë autoritare të drejtimit. Madje, Meidani është firmëtar i Lëvizjes më të re të Ben Blushit, ndaj bën çudi që nuk merr pjesë.
I treti i munguar i rëndësishëm është kreu i PDIU-së, Shpëtim Idrizi. Ky i fundit, prej kohësh është shprehur për mungesën e koherencës brenda koalicionit. Idrizi nuk ka kapërdirë sjelljen e qeverisë me shprehjen e shovinizmit nga diplomacia greke, çështjen e varrezave greke dhe raportin hemafrodid të pushtetit me çështjen çame. Po kështu, Shpëtim Idrizi ka sulmuar ashpër mosçeljen e dosjeve dhe heshtjen e Edi Ramës për heqjen e dekoratave ndaj ish-udhëheqësve komunistë të vendit. Duket këto arsye e kanë detyruar të mos shkelë në atë sallë, e cila tek e fundit është plot me ish-komunistë.
