Nga Erion Kristo
Ky komunikim ka lidhje me Ministrin e Brendshëm.
I nderuar zoti Ministër. Kam vënë re këto ditë se ju keni rreshtuar policinë kundër qytetarëve. E gjitha kjo në pamjen e ligjit. Unë vetë nuk pajtohem me dhunimin e policëve. Ata përveçse mbrojtes të ligjit janë dhe të afërmit tanë. Këtë e kanë pohuar edhe protestuesit. Po nëse protestuesit mund të gabojnë për shkak të hallit të tyre, nuk i lejohet policisë të humbë durimin. Përballë ka njerëz.
Rrahja dhe dhunimi i grave dhe fëmijëve; procedimi penal me akuza pa fund për protestuesit;
procedimet penale komplet qesharake ndaj opozitës; mungesa e hetimeve lidhur me krimin ekonomik të tenderimit dhe financimit të rrugës, më kujtojnë klimën e terrorit përballë banorëve të Kukësit.
Duke qenë se kam qenë dhe do të jem gjithmonë në krah të qytetarit, shpall mospajtimin tim të plotë me praktikat e policisë. Ju po i jepni policisë drejtimin e një policie politike. Dhe si të tillë, nuk e meritoni mbështetjen time. E di që mund të thoni se nuk ju prishet puna nga kjo. Por ishit ju që i bëtë thirrje shoqërise civile të mbështesë policinë. Kam ende shpresë se ju do të reflektoni. Mënyra se si menaxhuat protesten e fundit tregon paaftësi ose në rastin më të keq, tentativë për të përdhosur protestën dhe protestuesit. Nuk pashë asnjë analizë të kësaj situate. Policia është në shërbim të qytetarëve, jo të pushtetarëve. Ju po rrihni fëmijët e shqiptarëve për t’i bërë qejfin pushtetareve. Ju përmendni ligjin. Po ju jeni mishërimi i moszbatimit të ligjit. Juve bëni më të lehtën: godisni të pambrojturit. Mos kërcënoni banorët e Astirit, as fëmijët e tyre. A ka ndonjë procedim nga organet tuaja për policët që kanë shkelur ligjin nëpër komisariate. Ju keni thënë se nëse një polic sillet keq, jeni ju përgjegjës. Unë po ju bëj juve përgjegjës për këtë situate. Ndoshta nuk kam fuqi të imponohem, por e di se kam të drejtë. Policia nuk mund të hakmerret me të arrestuarit.
Ju bëj thirrje të bëni zap policet tuaj ekstremistë politike. Nëse nuk i merrni në konsideratë këto gjëra, as ne nuk ju marrim në konsideratë.
