Një nënë 35-vjeçare, Aida Koçi, vdiq sot në mëngjes bashkë me foshnjen e saj të porsa lindur në maternitetin “Koço Glozheni” në Tiranë, pas komplikacioneve të rënda shëndetësore dhe sorollatjeve nga një spital në tjetrin.
Familiarët e 35 vjeçares akuzojnë mjekët
Të afërmit e saj akuzojnë mjekët e spitalit për vonesa nga njëri proces në tjetrin dhe mungesa të shërbimit dhe mjeteve, duke filluar nga mungesa e personelit ku janë paraqitur, sallat e mbyllura, mungesa e barrelës për transportin e të sëmurës, mungesën e oksigjenit etj.
Drejtoresha e maternitetit, Rubena Moisiu, duke komentuar akuzat e familjarëve, ka pohuar se janë duke u bërë të gjitha verifikimet nëse ato qëndrojnë apo jo, duke shtuar se urgjenca e maternitetit është e hapur gjatë gjithë 24 orëve.
Policia
Ndërsa policia njofton se të afërmit e gruas kanë thyer derën e shërbimit të urgjencës si dhe disa xhama dhe për këtë arsye është shoqëruar vëllai i gruas shtatzënë. Sipas deponimit të mjekëve, sapo është dhënë lajmi se ka vdekur foshnja, të afërmit e gruas kanë shkatërruar disa pajisje në pavion.
Policia ndërkohë ka sekuestruar kartelat për të parë procedurën e shërbimit ndaj gruas si dhe po merr deklaratat e mjekëve dhe të të afërmve të saj. Mësohet se prokuroria ka nisur tashmë hetimet për neglizhencë dhe pakujdesi të mjekëve.
Njoftimi Zyrtar i policisë:
Rreth orës 06:00, mjekët e Spitalit “Koço Glozheni”, kanë lajmëruar tek numri 112 se kanë një konflikt në pavionin e urgjencës. Në momentin e arritjes së shërbimeve në urgjencën e spitalit kanë konstatuar derën e pavionit të dëmtuar si dhe xhamat.
Gjithashtu mjekët kanë sqaruar se ka vdekur foshnja e porsalindur, dhe familjarët e irrituar kanë shkaktuar dëmet në pavion. Për të sqaruar rrethanat e ngjarjes shërbimet kanë ftuar shtetasin F. O. (i vëllai) që të kalonte me to në komisariat për një deklarat.
Rreth orës 07:00 kanë njoftuar mjekët e spitalit se ka vdekur shtetasja Aida Çakaj, 35 vjeçe, banuese në Tiranë. Menjëherë është bërë e mundur që shtetasi F. O. të kaloi tek spitali.
Grupi hetimor në vendin e ngjarjes ka tërhequr rregjistrat e spitalit dhe janë shoqëruar për të dhënë deklarata mjekët që kanë qënë në punë. Vazhdojnë hetimet për zbardhjen e plotë të ngjarjes.
Ministria e Shëndetësisë
Ministria e Shëndetësisë deklaron se nëna 35 vjeçarje humbi jetën nga një hemorragji masive në shpretkë.
Në njoftimin e Ministrisë së Shëndetësisë përshkruhen të gjitha lëvizjet si dhe problemet që ka shfaqur pacientja, nga momenti kur është paraqitur në maternitet deri në orën 05:00 kur ka humbur jetën. Ministria deklaron se të gjitha lëvizjet janë bërë me autoambulancë nën asistencën e personelit mjekësor.
Nojftimi i plotë i Ministrisë së Shëndetësisë.
Pacientja A. Ç., e datëlindjes 28/07/1981, lindur në Kukës dhe banuese në Bathore, Tiranë, shtatëzania e tretë, është paraqitur në SUOGJ “Koço Gliozheni” rreth orës 22 e 30 minuta të datës 15/09/2016. Pacientja paraqiti ankesa për vështirësi në frymëmarrje, cianozë periorale dhe dhimbje në regjionin perikardiak.
Në Repartin e Pranimit të Shërbimit të Obstetrikës të këtij spitali, është ekzaminuar nga mjekët e rojes në abdomen, pasi gruaja ka refuzuar vizitën vaginale, e cila rezultoi me RZF (Rrahjet e Zemrës Fetale) prezente, uterus të qetë, pa kontraksione, paraqitje oblik-cefalik në palpacion, pa hemorragji të dukshme.
Në këto kushte, pacientja dërgohet me autoambulancë nën asistencë të personelit mjekësor rreth orës 23 e 15 minuta në Urgjencën e QSUT “Nënë Tereza,” dhe pas mbërritjes është vizituar nga mjeku kardiolog. Më tej, nisur nga dispnea, cianoza dhe dhimbja prekordiale që paraqiste pacientja, rreth orës 1 e 45 minuta dërgohet me autoambulancë nën asistencën e personelit mjekësor të shërbimit të Urgjencës në SU “Shefqet Ndroqi”.
Pacientja u paraqit në SU “Shefqet Ndroqi” rreth orës 02 të datës 16/09/2016. Aty konstatohet një rënie e kuadrit të gjakut, grafi pulmonare normale, dhe u dyshua për hemorragji të brendshme pa burim të përcaktuar.
Për këtë arsye, pacientja rikthehet në SUOGJ “Koço Gliozheni” në orën 4 të datës 16/09/2016, e shoqëruar me personel mjekësor me oksigjen dhe në perfuzion me dopaminë , ku shtrohet me diagnozën: “Gravidancë 41-42 javë oblik-cefalik, feto-morto in utero, abdomen akut”.
Qysh në shtrim, përshkruhet gjendje e rëndë, e zbehtë, me djersë, puls të dobët takikardik 120/min, TA (Tension Arterial) 83/40 mm të shtyllës së zhivës.
Në këto kushte, transferohet menjëherë në reanimacion, ku fillohet reanimimi dhe monitorimi.
Vazhdoi trajtimi i pacientes me gjak, dopaminë, adrenalinë dhe O2 nazal dhe kortizonik.
Në kushtet e gjendjes së rënduar të pacientes, u thirr konsultë e zgjeruar, dhe megjithë vazhdimin e reanimimit, gjendja e pacientes vazhdoi të rëndohet, me puls periferik, me shenjat tipike të gjendjes së shock-ut.
Në këtë situtatë, konsulta vendosi që pacientja të futet në sallën operatore me diagnozën: “Abdomen Akut”, me dyshim për hemorragji të brendshme.
Në orën 5, pacientja e fut në sallën operatore, ku u hap barku dhe u konstatua hemoperitoneum, rreth 2500 ml, me koagula të shumta, kryesisht majtas, uterusi (mitra) intakt (e paprekur). U nxorr fetusi i vdekur (vdekje e freskët), likid i pastër, placentë normale.
Nisur nga reperti kirurgjikal i paraqitur në orën 5 e 45 minuta u kërkua konsultë nga kirurgu, i cili konstatoi hemorragji masive në regjionin e shpretkës dhe koagula të shumta në këtë zonë.
Megjithë ndihmën mjekësore të ofruar, pacientja fatkeqësisht ndërroi jetë.
Kështu, të gjitha lëvizjet e pacientes janë bërë me autoambulancë nën asistencën e personelit mjekësor dhe shoqëruar me dokumentacionin mjekësor përkatës.
Autoambulanca SUGJ “Koço Gliozheni”– QSUT: TR 3516 L
Autoambulanca QSUT– SU “Shefqet Ndroqi”: TR 9438 K
Autoambulanca SU “Shefqet Ndroqi” – SUGJ “Koço Gliozheni”: TR 9604 K
