Ervin Bushati është deputeti i parë socialist që hetohet nga SPAK-u, pasi Partia Demokratike e denoncoi për mosdeklarim të pasurisë dhe falsifikim të dokumenteve. I ftuar në Radarin Informativ në ABC përballë gazetares Jonida Shehu, ai u shpreh i pashqetësuar, ndërsa deklaroi se nuk ka punuar asnjë ditë në shtet dhe në ekzekutiv, ndërsa pronat i ka të gjitha të trashëguara nga familja. Bushati tha se SPAK-u nuk ka konfirmuar hetimin kundër tij, por i ktheu përgjigje PD-së duke i thënë se “e kemi këtë çështje”. Të gjithën, ai e cilëson një çështje politike, tek shton se “kam votuar për këtë drejtësi, le të çohet deri në fund”.
Procedimi penal kundër Ervin Bushatit është në fazën e hetimit dhe po ndiqet prej tetë muajsh nga prokurorja e SPAK-ut, Doloreza Musabelliu. PD e depozitoi kallëzimin që në tetor 2018 dhe çështja u kalua nga Prokuroria e Tiranës tek SPAK. PD-ja e akuzon socialistin se nuk deklaroi shtatë pasuri të paluajtshme, përfshirë më shumë se 3100 m2 truall në Tiranë, Qerret dhe Sarandë.
7 pasuritë që PD-ja akuzoi Ervin Bushatin se nuk i deklaroi:
Një pasuri me sipërfaqe 938 m2 truall, në Tiranë, e regjistruar më 21.04.2017.
Një pasuri me sipërfaqe 600 m2 truall, me sipërfaqe ndërtimi 327 m2, në Tiranë, e regjistruar më 21.04.2017.
Një pasuri me sipërfaqe 938 m2 truall, në Tiranë, e regjistruar më 25.07.2014.
Një pasuri me sipërfaqe 76 m2, ndërtesë, në Qerret, Kavajë, e regjistruar më 30.05.2016.
Një pasuri me sipërfaqe 376 m2 truall, në Qerret, Kavajë, e regjistruar më 30.05.2016.
Një pasuri me sipërfaqe 660 m2 truall, në Sarandë, e regjistruar më 17.07.2014.
Një garazh me sipërfaqe 42 m2, në Sarandë.
