Përmes një postimi në Facebook, kryetari i Aleancës për Ardhmërinë e Kosovës, Ramush Haradinaj ka konfirmuar se i është përgjigjur pozitivisht ftesës së Kryeministrit, Albin Kurti për t’u takuar nesër për të diskutuar rreth dialogut Kosovë-Serbi. Haradinaj shkruan se për të çështja e dialogut për njohje, gjithmonë ka qenë çështje mbipartiake.
“I jam përgjigjur pozitivisht ftesës së Kryeministrit Kurti, për një bashkëbisedim lidhur me takimet e fundit që janë zhvilluar në Bruksel. Për mua dhe Aleancën, çështja e dialogut për njohje, gjithmonë ka qenë çështje mbipartiake. Këtë përcaktim e kam pasur edhe gjatë kohës sa e kam udhëhequr qeverinë e vendit” – ka shkruar Haradinaj.
Ai ka shtuar se gjithmonë e ka konsideruar se për tema të interes nacional, nuk ka qeveri dhe opozitë. Kosova dhe Serbia më 27 gusht kanë arritur marrëveshje për heqjen dorë nga lëshimi i dokumenteve për hyrje-dalje për shtetasit e dy vendeve. Kjo marrëveshje nënkupton se qytetarët e Serbisë dhe ata të Kosovës, do të mund të kalojnë kufirin me kartat e tyre të identitetit, pa pasur nevojë që të pajisen me një letër shtesë të hyrje-daljes.
