Kryeministri Rama ka reaguar në lidhje me lajmet që po qarkullojnë së fundmi se, hakerat kanë kërkuar 30 milionë euro për të rikthyer e-Albanian. Ky lajmi publikua fillimisht nga televizioni Top Channel dhe tashmë po bën xhiron e rrjetit. Në një postim në Facebook ai i drejtohet TCH, duke e akuzuar për shpifje dhe me urdhër kërkon fshirjen e këtyre lajmeve, pasi po përhapin panik.
“Gjyqet me median për shpifje, përfshirë edhe shpifjet që përhapin panik, nuk janë në praktikën e qeverisë sonë! Prandaj i bëj thirrje publike TCH të ndalë menjëherë valën e shpifjeve dhe përhapjen e panikut lidhur me pasojat e agresionit kibernetik mbi Shqipërinë! Lajmet për një gjobë 30 milionë euro nga hakerat apo për shkatërrimin e të dhënave janë krejt të rreme! Qeveria ka informuar aq sa mund të informojë, në ndërkohë që lufta nuk ka mbaruar dhe pas hakerave qëndron një shtet tjetër, jo një bandë dosido digjitale që merret me gjoba!
AKSHI dhe një skuadër e superspecializuar ekspertësh të huaj, po luftojnë natë e ditë për rimëkëmbjen e plotë në kohë rekord të sistemeve pas zmbrapsjes së sulmit .Eshtë e turpshme që të gënjehet publiku në këtë farë feje, cilatdo qofshin motivet e kësaj vale shpifjesh haluçinante”, shkruan Rama. Ndërsa kujtojmë se sot është dita e katërt që e-Albania është hakeruar dhe të dhënat tona po shkatërrohen.
