Partia Drejtësi Integrim dhe Unitet ka reaguar lidhur me paralajmërimin e Ministrisë së Shëndetësisë ku ritet fetare cilësoheshin si “grumbullime” dhe një shembull negativ në këtë kohë të pandemie.
Përmes një deklarate për mediat, PDIU deklaron se stereotipi negativ me të cilin këto institucione etiketojnë ceremonitë fetare, “nuk mund të jetë kurrsesi i pranishëm në jetën dhe këndvështrimin tonë për botën dhe fenë”.
Gjithashtu PDIU i bën thirrje shtetit që ndërkohë që pjesa më e madhe e shteteve po hapin të gjitha segmentet e jetës normale, shteti shqiptar duhet të “përcaktojë rregullat dhe respektimin e distancimit social dhe të lejojë sa më shpejt kthimin gradual të normalitetit në vend.”
Deklarata e plotë e PDIU-së:
Drejtuesit e fesë në vend dhe besimtarët, sot kanë ngritur në media shqetësimin mbi mbylljen e objekteve të kultit dhe shembullin e marrë nga Ministria e Shëndetësisë për distancimin social, ku cilësohen grumbullimet fetare si shembulli negativ në kohën e pandemisë.
Më së pari kujtojmë që ceremonitë fetare nuk mundët të cilësohen kursesi grumbullime fetare dhe ky është një mentalitet i papranueshëm dhe që tregon mungesën e respektit të insitucioneve qeveritare ndaj fesë.
Stereotipi negativ me të cilin këto institucione etiketojnë ceremonitë fetare, nuk mund të jetë kurrsesi i pranishëm në jetën dhe këndvështrimin tonë për botën dhe fenë. Më së fundi, institucionet shtetërore duhet të kujdesen për përditshmërinë e jetës në vend dhe nuk duhet kurrsesi të ndërhyjnë në vendimarrjen e përfaqësuesve të fesë, pasi kjo sjell në memorje një kohë të errët e të kaluar prej kohësh në Shqipëri dhe ky mentalitet nuk duhet të kthehet më kurrë në vendin tonë.
Në kohën që pjesa më e madhe e shteteve po hapin te gjitha segmentet e jetës normale në vend përfshi stadiumet, plazhet, restorantet e shkollat, e vetmja gjë që duhet të bëjë shteti shqiptar është të përcaktojë rregullat dhe respektimin e distancimit social dhe të lejojë sa më shpejt kthimin gradual të normalitetit në vend.
