Shqipëria është një vend pjesërisht i lirë. Kështu thotë raporti për vitin 2017 i Freedom House i cili e rendit Shqipërinë në vendin e 68 nga 195 vende të marra në analizë. Kjo renditje është më e ulët se e një viti më parë, ku ishin të 67-ët.
Ndërsa sa u përket të drejtave politike, Shqipëria merr 3 pikë (vlerësimi 1:7, ku 1 është më e lira dhe 7 më pak e lira). I njëjti vlerësim vlen edhe për të drejtat civile (3:7).
Gjithashtu Kosova, në këtë raport, rënditet në mesin e vendeve “pjesërisht të lira”, ashtu siç ishte edhe vitin e kaluar.
Nga 195 shtete të marra në vlerësim, 87 (45%) janë klasifikuar si të “lira”, 59 (30%) si “pjesërisht të lira” (ku përfshihet edhe Shqipëria) dhe 49 (25%) si “jo të lira”. Lindja e Mesme dhe Afrika e Veriut kanë renditjen më të keqe në botë për vitin 2016, të ndjekur nga afër nga Euroazia.
Sa i përket Ballkanit, raporti “Liria në botë 2017” vlerëson që”…. proceset korrekte zgjedhore dhe sundimi i ligjit janë përkeqësuar edhe më tutje, derisa Bashkimi Europian e ka neglizhuar rolin e vet në promovimin e demokracisë në mesin e shteteve që synojnë pranim”.
Ndërsa një prej shkelësve më të mëdhenj të lirisë në vitin 2016 sipas Freedom House ishte Rusia.
“Rusia, në paraqitjen e jashtëzakonshme të arrogancës dhe armiqësisë, ka ndërhyrë në proceset politike në Shtetet e Bashkuara dhe demokracitë e tjera, e ka përshkallëzuar mbështetjen e saj ushtarake për pushtetin diktatorial të Bashar al-Assadit në Siri dhe e ka forcuar okupimin e saj ilegal në territorin e Ukrainës”, thotë raporti.
Ky është viti i 11-të që organizata Freedom House boton këtë raport.
