Eurodeputetja franceze e ekstremit të djathtë, Dominique Bilde, ka shprehur qëndrimin e saj kundër liberalizimit të vizave për Kosovën si dhe anëtarësimit të saj në BE. Bilde është shprehur përmes një postimi në rrjetet sociale se e rëndësishme për momentin është që dialogu Kosovë-Serbi të mbyllet me njohje reciproke një orë e më parë . “Kosova ishte në program këtë javë në Parlamentin Evropian. Ne refuzojmë zgjerimin e BE-së me këtë vend. Ne gjithashtu kundërshtojmë që të hiqen vizat për shumë shtetas të tyre. Është koha të ndalet kjo marrëzi”, ka shkruar Bilde.
Në lidhje me këtë deklaratë ka reaguar sot ish-ambasadorja e Kosovës në SHBA, Vlora Çitaku, e cila i kujtoi eurodeputetes se Kosova i ka plotësuar të gjitha kushtet dhe se liberalizimi nuk ndërlidhet me zgjerimin. “Me gjithë respektin zonjë, e keni gabim për këtë. Institucionet e Kosovës i kanë plotësuar të gjitha kriteret për udhëtim pa viza kohë më parë. Liberalizimi i vizave nuk ka lidhje me zgjerimin. Qytetarët e Venezuelës udhëtojnë pa viza në BE”, ka shkruar Çitaku.
Franca dhe Holanda janë dy shtetet më skeptike për procesin e liberalizimit të vizave, përkundër vërejtjet që i ka shprehur Kosova se është shteti i vetëm në Europë që po izolohet padrejtësisht.
