Pa pritur përfundimin e votimit, 2 orë para mbylljes së kutive, kandidati për kryetar të PD, Eduard Selami ka akuzuar rivalin e tij Lulzim Basha se përmes ndikimit ka prishur neutralitetin e garës.
“Këto zgjedhje kanë filluar si të pabarabarta dhe kjo pabarazi është verifikuar në disa probleme që kanë dalë. Disa komisionerë kanë ndërhyrë dhe kanë prishur neutralitetin, duke u kërkuar votuesve që të votojnë zotin Basha”, ka thënë Selami.
Selami ka denoncuar prezencën e fotografisë së Lulzim Bashës qenrat e votimit duke u shprehur i bindur që procesi ka qenë i paplotë.
“Ai është miku im, por miqësia mënjanë, ai ose nuk di rregullat e demokracisë, ose ka shkelur neutralitetin. Megjithëse ky proces është i paplotë, nuk dua ta paragjykoj pasi është ende shpejt për një qëndrim përfundimtar”, ka thënë Selami.
Selami ka kundërshtuar edhe numërimin e votave në Tiranë, sipas tij do të ishte më mirë që të bëhej në rrethet ku është kryer votimi.
