Ish-drejtorja e doganave, Elisa Spiropali ka sulmuar Ilir Metën në rrjetet sociale. Ajo nuk është e vetmja, por është ndër kryesoret në PS, pasi mban postin e Sekretares për Rininë.
“Nëse do ekzistonte konsensusi patriotik, atëherë nuk do ekzistonin patriotët! Patriotët çajnë male për të kaluar trenin e historisë dhe nuk bëhen mullar së bashku nga frika se i ha bajlozi i matanë oqeanit”, shkroi Spiropali, duke nënkuptuar Metën, sepse është ai që ka artikuluar shprehjen “konsensus patriotik”.
“Më falni, po unë kam shumë respekt për patriotët dhe e kam të pamundur t’i shoh Samiun e Abdylin, Ismail Qemalin apo Fan Nolin, si paraardhës të konsensusit të prodhuar nga trysnia ekstreme e superfuqive aleate që shkoi deri në paralajmërimin publik të SHBA-ve për futjen në listën e zezë të Presidentit Obama të atyre që sot na tregojnë patriotizmin konsensual! Amerikanët thonë në këto raste: Give me a break! Shqiptarçe thuhet ndryshe, por s’kam konsensusin e partisë për të folur për këtë punë, kështu që po e lë me kaq”, shkruan Spiropali në rrjetin social, facebook.
