Investimet në raport me PBB, më pak se në 2008
Ekonimisë shqiptare i mungojnë investimet, si nga privatët ashtu edhe shteti. Sipas shifrave të Bankës së Shqipërisë, investimet në ekonomi në raport me PBB, janë poshtë nivelit të vitit 2008 si dhe shumë poshtë mesatares historike. Sipas matjeve të bankës qëndrore në fund të 2015 raporti i shpenzimeve për investime ndaj PBB-së ka qenë 26.5 për qind, në një kohë që mesatarja historike është 2008-2014 është 28.7 për qind.
Rënia e investimeve në radhë të parë ka ardhur si pasojë e shkurtimit të planeve të qeverisë për financimin e projekteve të punëve publike. Katër vitet e fundit investimet publike kanë pësuar rënie sistematike. E njëjta gjë është e parashikuar edhe për këtë vit. Tashmë qeveria po investon edhe më pak se objektivi i përcaktuar nga FMN që është një normë financimesh sa 5 për qind e PBB.
Situatë e ngjashme është edhe në investimet private në ekonomi. BSH flet për rënie të ritmeve të rritjes së investimeve në pjesën e fundit të vitit 2015. Në këtë periudhë me ulje kanë ardhur edhe importet e makinerive, pajisjeve dhe pjesëve të këmbimit. Konsumi në rënie si edhe mungesa e kreditimit ka bërë që ndërmarrjet të punojnë poshtë kapaciteteve të tyre prodhuese dhe për këtë pasojë të parët që shkurtohen janë investimet.
