Kryeministri: Teza “Nuk ka zgjedhje pa opozitën” është përpjekje e sponsorizuar, e paguar mbi dorë apo nën dorë, me para apo me peshqeshe. Ju nuk doni zgjedhje sepse i fiton PS e nuk i ndahet reformës në drejtësi.
Kryeministri Rama është shfaqur i ashpër në deklaratën e tij në sallën e Kuvendit, kundër kryetarit të LSI-së Ilir Meta, por edhe gjithë atyre që janë shprehur se pa opozitën nuk ka zgjedhje. Rama ka përmendur disa çështje të hapura, të cilat duket se ai, prej kohësh i përdor si kërcënim për LSI-në dhe kryetarin e saj Ilir Meta. Pikësëpari është reforma në drejtësi dhe vetting-u. Por, Rama ka ashpërsuar akoma më tej gjuhën, kur tha se është i sponsorizuar qëndrimi se nuk ka zgjedhje pa opozitën.
“Përpjekja për t’u thënë shqiptarëve se zgjedhjet pa opozitën nuk mund të bëhen, është përpjekje e sponsorizuar, e paguar mbi dorë apo nën dorë, me para apo me peshqeshe, për të treguar që në thelbin e vet është qesharak“, tha Rama.
Ai ka përmendur çështje mjaft sensitive, për të cilat është akuzuar edhe kryetari i Kuvendit Ilir Meta. Është fjala për çështjen e CEZ, e cila sipas Ramës, është një ndër arsyet pse ekziston çadra e opozitës.
Rama ka hedhur poshtë edhe propozimet e PDIU-së për Paktin Kombëtar, kur këmbënguli që policia nuk i bën zgjedhjet, duke lënë të kuptohet se nuk ka nevojë për ndryhime në kupolën drejtuese të policisëapo për një task force të prokurorisë të vendosur pranë KQZ-së për ndëshkimin e manipulimit të votës.
Kryeministri Edi Rama tha se ekziston një përpjekje për të ndaluar Partinë Socialiste të hyjë në zgjedhje. Sipas tij, kjo përpjekje vjen për të ndaluar shtetin të bëhet shtet, për të ndaluar stabilitetin e vendit dhe për të ndaluar procesin e vetting-ut.
Githashtu Rama akuzoi PD-në se ka frikë nga vetting-u, prandaj po proteston në çadër dhe thelbi i protestës së tyre nuk janë zgjedhjet.
“Çadrës nuk i dha jetë përpjekja për zgjedhje më të mira, por frika nga vetting-u. Në thelb nuk është një përpjekje për të garantuar zgjedhje të lira e të ndershme, nuk ka një përpjekje për të bërë opozitën të hyjë në zgjedhje, por për të mos lejuar PS-në të hyjë në zgjedhje se kjo parti përbën një kërcënim fituesja e zgjedhjeve. Frika nga drejtësia nuk është një frikë e zakonshme që prodhon reagime të zakonshme”, tha Rama.
