Ditën e djeshme disa media on line dhe jo vetëm bën me dije se kryetari i FRESSH, Eljo Hysko dha dorëheqjen. Duket ideja që dikush duhet të largohet nga posti po zë vend në propagandën mbrojtëse të kryeministrit. Teksa pothuaj e largoi Lindita Nikollën, pak ditë më parë, tani po bën një stress test me kryetarin e Rinissë së partisë së tij, e cila ka qenë shumë e zellshme të furnizojë kreun e qeverisë me aktorë për “dialog”. Vetë Elio Hysko në një reagim të gjatë, ashtu si dhe shefi i partisë dënon gazetarët, meqë ata e kanë përherë fajin. Ndërkohë deklarata e tij nuk sqaron asgjë; ajo ngjan si një reagim unisex, të cilën e merr edhe për dorëheqje, edhe për përgënjeshtrim. Më poshtë e keni të plotë këtë reagim.
Për studentët, dialogun dhe sajesat!
FRESSH i konsideron legjitime dhe të drejta 8 kërkesat e studentëve. Protesta e zhvilluar po na tregon ngadalë-ngadalë se besimi tek mekanizmat për demokratizimin e vendit janë rimëkëmbur.
Shtatë vjet pas 21 janarit 2011, asaj dite të keqe për kombin tonë, qytetarët kanë filluar të kuptojnë se jo vetëm që nuk vdes në shesh, kur del të kërkosh të drejtat, por madje në rastin në fjalë edhe merr atë çka të takon.
Përpos përqafimit të 8 kërkesave të studentëve, FRESSH mbështet dialogun si e vetmja formë demokratike e të ndërvepruarit në shoqëri. Kemi bindjen dhe besimin se shumë shpejt studentët do të zgjedhin një modalitet të gjithëpranuar dialogu, nga i cili do të nisi procesi për transformimin e arsimit.
Bindjet politike nuk mund të jenë pjesë e diskursit për të drejta themeltare të arsimit, ndaj ne hedhim poshtë me neveri çdo akuzë të bëra këto 12 ditë se pjesemarrja e lirë dhe individuale e disa prej aktivistëve të FRESSH në protestë ka patur qëllime të mbrapshta. Ato janë shprehja më kuptimplotë e demokracisë së brendshme.
Nuk mund të thuash të njëjtën gjë për të tjerët, të cilët dita ditës po tentojnë të zaptojnë e bëjnë pis megafonin e dlirë e çiltër të studentëve për të ndërtuar retorikën e tyre me ëndërra rotacioni pushteti, pa asnjë lidhje me revolucionin në arsim! Partizimi dhe dhuna që po mbarsin duhet të qëndrojnë larg tyre!
Është një moment unik për studentët që këtë energji të jashtëzakonshme ta kthejnë në një proces historik të transformimit të arsimit.
Rruga e duhur është nëpërmjet dialogut, pa u tërhequr asnjë milimetër nga 8 kërkesat e tyre.
Në lidhje me sajesat që janë publikuar në formën e mesazheve në grup dua t’i kërkoj ndjesë për shqetësimin familjeve të Luisit, Glindxhetit, Tedit, Ivës, Maurës, Endrës, Arlindit & Keidës apo kushdo që do jetë shënjestra e radhës, të cilët janë bërë viktima të montimeve banale nëpërmjet fake chat app dhe sot po linçohen virtualisht. Ato janë kryekëput trillime të një mendje të semurë, e cila nuk paska kufinj e moral.
Shpreh keqardhje që portalet e fanpage-t janë kthyer në therrtore virtuale të çdokujt që nuk i shërben qëllimeve të sponsorave të tyre. I inkurajoj të rinjtë, jo vetëm ata të FRESSH që të qendrojnë për atë që besojnë, pa pasur frikë se ndonjë kasap virtual do t’i vërsulet me sëpatën e sajesave.
Gazetarët me një fije profesionalizmi, mos t’i shndërrojnë mediat e tyre në gijotina virtuale për të rinjtë, por të ndalojnë publikimin e të pavërtetave.
Shoqëria jonë nuk fiton asgjë nga urrejtja, dhuna, shpifja apo gënjeshtra.
Ne kemi nevojë që zjarrin e shpresës që sollën studentët ta mbajmë ndezur bashkë për të ndriçuar e ngrohur të tashmen e të ardhmen tonë e jo për t’i vënë flakën njëri-tjetrit, vetëm se disa kanë ëndërra rotacioni të pushtetit e aspak të revolucionit në arsim.
Ne mund të shkojmë përpara vetëm nëpërmjet dialogut, besimit e duke i dhënë një dorë njëri tjetrit. Jam i bindur se STUDENTËT MUNDEN, RINIA MUNDET!
