Ndihmës sekretarja amerikane e Shtetit për Çështje Evropiane dhe Euroaziatike, Karen Donfried, ka zhvilluar një vizitë në Shkup ditën e sotme. Gjatë gjithë fjalimit të saj ajo ka shprehur mbështetjen për Shqipërisë dhe Maqedoninë e Veriut për fillimin e bisedimeve për anëtarësim në Bashkimin Evropian. Sipas saj, këto negociata duhet të nisin sa më parë, pa humbur më shumë kohë.
“Kemi thënë tashmë dhe do ta përsërisim se ardhmja e Maqedonisë së Veriut është në Bashkimin Evropian. Shtetet e Bashkuara mbështesin fuqimisht aspiratat tuaja dhe dëshirojmë që sa më shpejt të jetë e mundur të mbahet konferenca ndërqeveritare me Maqedoninë e Veriut dhe Shqipërinë. Ju keni përfunduar detyra të vështira duke përmbushur reformat e nevojshme dhe meritoni të ecni përpara me shpejtësi”, deklaroi Donfried.
Ajo tha se anëtarësimi i Maqedonisë së Veriut dhe i Shqipërisë në Bashkimin Evropian, do të kontribuojë për një stabilitet më të madh në Ballkan dhe një prosperitet më të madh në Evropë, ndërsa vlerësoi lart edhe mbështetjen që autoritetet maqedonase i kanë dhënë Ukrainës në luftën kundër agresionit rus.
