Një shpërthim i fuqishëm me eksploziv është regjistruar edhe në qytetin e Durrësit.
Shpërthimi ka ndodhur në lokalin e shtetasit Fetah Matajt në lagjen nr.15 në Porto Romano. Eksplozivi ishte vendosur në katin e parë të godinës tre katëshe.
Nga shpërthimi fatmirësisht janë shkaktuar vetëm dëme materiale. Në vendngjarje ka mbërritur policia e cila ka nisur hetimet për identifikimin dhe arrestimin e autorëve.
Pista e parë ku po hetohet është hakmarrja. Fetah Mataj njihet si person me precedent penal të mëparshëm në qytetin bregdetar. Mataj ka qenë ish-punonjës i Bashkisë në Parkun e Autobusëve.
Gjykata e Krimeve të Rënda Tiranë më datë 28 shtator 2012, e ka dënuar me 5 vjet burg dhe 1,5 milionë lekë gjobë për shtrëngim me anë të kanosjes për të përfituar.
Mataj u ndalua më 26 qershor 2011 për tre gjoba të vendosura ndaj punonjësit të një kompanie private në Shkozet, ndërsa i bënte presion për gjobën e katërt 750 mijë lekë. Në vitin 2009 është arrestuar si sekser në një çështje korrupsioni me funksionarë të Bashkisë së Durrësit.
