Zëdhënësja e Partisë Demokratike, Ina Zhupa ka vijuar akuzat në drejtim të kryeministrit Edi Rama, për të cilin tha se nuk qeveris dot pa “non grata” e njerëz të inkriminuar. Zhupa tha se ai punon, blen e vjedh vota në koalicion me parti “non gratash” duke sfiduar hapur vendimet e SHBA. Sipas saj, rifreskimi i pazarit Rama-Doshi në rezidenca qeveritare me takime kokë më kokë, reflektohet në emërimet dhe shkarkimet e zyrtarëve të Shkodrës.
“Bashkëqeverisja me Tom Doshin në Shkodër e jo vetëm, është prova më e madhe për këtë. Edi Rama ia ka dorëzuar pa kushte Shkodrën partisë Non Grata, madje edhe kandidaten për bashkinë ia ka përzgjedhur i padëshiruari i SHBA, Tom Doshi. Doshi ka frenat e krejt qeverisjes së Shkodrës, duke emëruar njerëz të inkriminuar që të blejë e të rrëmbejë vota për Ramën. Ndërkohë që socialistët e ndershëm duhet vetëm të nënshtrohen përballë pushtetit të non gratave. Rifreskimi i pazarit Rama-Doshi në rezidenca qeveritare me takime kokë më kokë, reflektohet në emërimet dhe shkarkimet e zyrtarëve të Shkodrës, siç është rasti i kryeinspektorit të ndërtimit, për Veriun, Serdar Hoxha. Ndërsa konfirmon pikërisht atë që vetë Doshi e thotë me zë e figurë: emërimin prej tij të kandidates për bashkinë. Me pak fjalë, Tom Doshi, vendos për gjithçka në Shkodër në emër të Edi Ramës. Ata janë bashkë dhe të pandarë” – tha Zhupa.
Zhupa gjithashtu shprehet se Edi Rama mashtroi Amerikën kur tha se nuk do të përfshinte në qeverisje, partinë non grata të Doshit, ndërkohë që me të ndan çdo qelizë qeverisje në Shkodër e Tiranë.
“Aleanca e Ramës me Doshin, pas shpalljes së tij non grata nga SHBA, ka qenë e pandalshme. Ai ka përfituar miliona euro nga qeveria, para të cilat janë hedhur për blerjen e votave njësoj si me 25 prill. Tom Doshi është sot Edi Rama. Vota e socialistëve përdoret për pushtetin e partisë non gratësa” – tha Zhupa.
