Ambasadori amerikan Donald Lu po punon prej disa ditësh që Edi Rama dhe Lulzim Basha të takohen me njëri-tjetrin në një tryezë dialogu. Kryeministri Rama ka shprehur të martën dakordësinë për të dialoguar me Bashën. Këtë gjë, kreu i qeverisë e pohoi edhe sot në Parlament.
“Jam i gatshëm për të biseduar, dhe unë vetë do të preferoja në çadër. Kam dy ditë që pres vendin dhe orën për të folur”- ka pohuar Rama.
Por takimi nuk po ndodh, sepse Lulzim Basha dyshon tek serioziteti i Edi Ramës. Kreu i opozitës kërkon një takim të përgatitur paraprakisht nga stafet përkatëse. Burime pranë kabinetit të Bashës bëjnë të ditur se që prej mëngjesit të së enjtes stafi politik i kryetarit të opozitës ka qenë në pritje të një takimi, për të përgatitur takimin me zotin Rama.
