Në seancën parlamentare të ditës së djeshme ka votuar edhe një deputet që nuk ka qenë i pranishëm në sallë. Këtë denoncim e ka bërë kreu i grupit parlamentar të LSI, Petrit Vasili.
Vasili ka publikuar në Facebook procesverbalin e seancës plenare të një dite më parë ku deklaron se Vangjel Tavo nuk ka qenë i pranishëm në Kuvend, por në procesverbal ai rezulton që ka votuar pro projektligjit.
Postimi i Vasilit:
Manipulohet votimit të ligjit për teatrin, përgjegjësi penale nga kryetari tek më i fundit. Dje maxhoranca manipuloi votimin e ligjit për teatrin. Deputeti Vangjel Tavo që mungonte në seancë rezulton votues.
Ky është një manipulim banditesk dhe vjedhje votash edhe brenda sallës së kuvendit nga po ata që vodhën votat në 25 qershor.
Ky votim është nul dhe Kryetari i Kuvendit Ruçi duhet të deklarojë që sot anullimin e votimit dhe përsëritjen urgjente të votimit, përndryshe ai si institucion ka rënë juridikisht, politikisht dhe moralisht.
Prokurorja e përgjithshme të fillojë hetimin për këtë vepër penale shumë të rëndë të manipulimit të votimit parlamentar. Tanimë hajdutët e votave janë ulur këmbëkryq në parlament dhe në krye të qeverisë. Nëse prokuroria mbyll sytë edhe përpara kësaj atëherë çdo qëndrim ndaj saj është plotësisht legjitim.
