Nga Ejona Zenelhasani
Në afërsi te fshatit Sllovë në Dibër ndodhet fshati Vleshë, në të cilin përpos gjithë bukurive natyrore ndodhet dhe burimi kurativ i “Ujit të Ftohtë”.
“Uji i ftohtë” është burim, nga i cili rrjedh uji i ftohtë akull dhe i pasur me disa lloj kripërash minerale. Prurjet ndryshojnë nga 70-80 litra për sekondë gjatë verës, ndërsa në dimër shkojnë deri në 100 litra për sekondë. Ajo çfarë e bën të veçantë këtë burim janë vetitë e mëdha kurative, sidomos për personat që vuajnë nga reumatizmi.
Uji i këtij burimi përdoret gjithashtu për vaditjen e të mbjellave të fshatit Vleshë dhe Sllovë, të njohura për kultivimin e fruta perimeve, veçanërisht mollëve vendase.
Kryesisht, gjatë sezonit të verës dhjetëra turistë në ditë, të grupmoshave të ndryshme vizitojnë këtë vend për të gjetur shërim. Pleq, të rritur e fëmijë, nga mbarë Shqipëria, por jo vetëm, persona me probleme të shëndetit, si dhe vizitorë që duan të shijojnë paqen dhe qetësinë që rrjedhja e ujit në burim të fal, vijnë të kalojnë pushime në këtë zonë.
Nga vizitorët e atjeshëm mësuam se disa prej tyre e kanë të nevojshme të qëndrojnë me javë për të bërë kurimin e nevojshëm, por mungesa e hoteleve i detyron të lëvizin ose të qëndrojnë përkohësisht diku afër.
E vetmja gjë që të ofrohet është një shitore e vogël e improvizuar, ku mund të blesh pije freskuese, të cilat ftohen në burim. Ish kryetari i komunës së zonës, Fatos Mandri tha për 27.al se banorët e zonës nuk dëshirojnë që të investohet, pasi uji është për të gjithë dhe nuk duhet privatizuar. Sipas Mandrit banorët këtë e shpjegojnë me legjendën se njerëzit që investojnë ka përt’i zënë mallkimi i “Ujit te Ftohtë.
Përpos mungesës së hoteleve dhe dyqaneve ajo çfarë të vështirëson më shumë udhëtimin është infrastruktura shumë e rënduar. 
Rruga automibilistike nuk është për të gjithë llojet e makinave, pasi është plot gropa dhe rrjedha uji. Kështu shumica detyrohen të parkojnë afër rrugës kryesore tek mulliri i vjetër i fshatit e rrugën deri sipër e bëjnë në këmbë. Ngjitja nuk është e lehtë, ndaj dhe nuk rekomandohet të merren gjëra të rënda me vete ndërsa parkimi kushton 100 lekë pa kupon tatimor dhe askujt nuk i kërkohet llogari për këtë.
Gjatë rrugës në këmbë të kënaq sytë pamja shumë e bukur e një ujëvare të vogël e cila është vazhdimi i rrjedhës së burimit të ujit të ftohtë. Ngjitja të ofron gjithashtu një pamje panaromike të fshatrave përreth nga lartësia e madhe mbi nivelin e detit.
Vizitorët vijnë kryesisht nga Peshkopia, Kukësi, Shkodra, Kosova, por nuk mungojnë vizitorë nga jugu i vendit, të cilët pasi kanë dëgjuar e vizituar një herë nuk kanë rreshtur më së ardhuri.
Gjatë vizitës sonë, te burimi hasëm një grua me probleme të paralizës. Gjatë ushtrimeve fizike dhe qëndrimit në ujë ajo filloi të ndjejë ftohtësinë e ujit në gishtat e këmbëve. Sigurisht që nuk është rasti i parë i të tilla mrekullive kuruese të “Ujit të Ftohtë”, pasi çdo vizitor ka një histori për të treguar se si i është përmirësuar shëndeti.
