Për të rikonceptuar klubin, presidenti i Partizanit vendosi në krye Dritan Dervishin. Ka jetuar gjatë në Verona dhe thuhej se mund t’i besohej merkato, gjë që në një farë mënyre e bëri. Por Tani ka edhe një aftësi të paparë për të bërë “armiq” në të gjithë territorin, pasi askush nuk po mundohet ta ndalë të flasë për këdo. Fillimisht u mor me Tiranën dhe i bëri për një lekë të gjithë ata që drejtonin ekipin tjetër të kryeqytetit, për të cilin në rini thonë se bënte tifo si i çmendur. Më pas u mor gjatë me Tan Taken e Skënderbeut. Ditë më parë nuk nguroi t’i sygjeronte me arrogancë trajnerit të Kombëtares, Xhani De Biazi, se cilin duhet të kishte në mendje për finalet e Francës. Dhe në fund ofendoi Mirel Josën, por ky i fundit tha se përgjigjen do t’ia japë kur të kthehet në Shqipëri, pasi ndoshta nuk donte të harxhonte lekë në telefon. Këtë zotërinë që flet kaq shumë, Gaz Demi e thirri për drejtor, por mbase është qari i tij që i doli “Murinjo”.
