Tensione të shumta kanë shoqëruar seancën e sotme parlamentare në Kuvendin e Shqipërisë.
Deputetja demokate e Shkodrës, Izmira Ulqinaku gjatë fjalës së saj ka lëshuar një serë akuzash ndaj kreut të Kuvendit Gramoz Ruçi.
Ulqinaku e akuzoi Ruçin si përgjegjës për vrasjen e 4 të rinjve në vitin 1991. Ajo e cilësoi karshillëk ndaj Shkodrës emërimin e Ruçit nga Rama në krye të Kuvendit.
“Unë po flas për herë të parë në Kuvend dhe rregulli e do të përshëndes edhe kreun e Kuvendit, por këtë s’mund ta bëj pasi jam mbesa e njërit prej dëshmorëve të 2 Prillit kur ministër i Brendshëm ishte Gramoz Ruçi. S’do t’a kisha menduar që pas 20 e kusur vitesh do të vija në Kuvend dhe do të gjeja në krye të tij”, tha ajo.
Ruçi iu përgjigj ashpër, duke i kërkuar të njohë më mirë historinë e fakteve dhe ngjarjeve. Ai i tha se Shkodra e ka mirëpritur dhe e ka të qartë që ai ai s’ka lidhje me atë ngjarje.
Menjëherë pas kësaj situate, kanë ndërhyrë nga salla deputetët e PD dhe LSI, të cilët kanë goditur tavolinat me duar.
