Ish-ministri i Drejtësisë, Ylli Manjani ka reaguar për dëbimin me urgjencë nga Shqipëria të shtetasit turk, Harun Çelik. Mësuesi turk kishte hyrë në Shqipëri me vizë false kanadeze me qëllim për të udhëtuar më tej drejt Kanadasë. Ai vuajti dënimin në Shqipëri për “falsifikim dokumentesh” dhe gjatë ditës së djeshme 1 janar 2020 (ditë pushimi për administratën) u mor me urgjencë dhe u dëbua drejt Turqisë, jashtë vullnetit të tij. Ylli Manjani në reagimin e tij thotë se Kryeministria ka për detyrë të japë sqarime nëse janë respektuar procedurat ligjore, dhe jo të shprehet se “kjo është çështje procedurash me të cilat Rama nuk merret”.
Statusi i plotë i Manjanit në facebook
E vërteta e parë e këtij viti.
Për dëbimin e turkut gylenist, reagimi i Kryeministrisë “…. kjo është çështje procedurash”, është i vërteti.
100% ashtu është! Kryeministri i sotëm nuk ka lidhje fare, po fare fare me procedurat. Ai i sheh procedurat si burokraci të tepërta dhe pengesa të bezdishme, pra si zhgarravina ligjore.
Ai i neverit procedurat, sepse ato kërkojnë kolegjialitet, respekt për mendimin, për propozimin, për debatin, për palën kundërshtare. Procedurat imponojnë barazi para ligjit, kompetencë të qartë vendimmarrëse, garanci që e drejta e dikujt nuk shkelet.
Shkurt me procedurë nuk ka kurrë one-man-show! Me procedurë në ngjarjet e tërmetit në detyrë duhet të ishte Haki Çako, por vetëm Hakiun se pamë gjëkundi. Me procedurë, nuk duhet të ishte prekur asnjë banesë e askujt pa lëshuar një akt adminiatrative dhe pa ju dhënë mundësi për mbrojtje ligjore.
Me procedurë nuk mund të kishte as parlament e as pushtet vendor njëpartiak.
Etj etj etj… Sa mbrapshtina do ishin shmangur nëse respektoheshin PROCEDURAT!
Ja pra sa i vërtetë ishte ai reagim i Kryeministrisë për Kryeministrin.
Asnjëherë nuk ka njohur e respektuar asnjë procedurë, ndaj s’ka se si të ndjehet përgjegjës për një gjë që se respekton.
Të paktën e pranojnë që “nuk merren me procedura”…
Por, për ta mbyllur këtë arsyetim me rastin e turkut pyetja është:
A u respektuan procedurat?! Një nga ato dhjetëra departamente me rroga të larta në Kryeministri a i verifikoi procedurat e këtij rasti?!
Cili është konkluzioni?!
Pyetja nuk shtrohet është apo jo çështje procedurash, por a u respektuan procedurat. A u vlerësua risku real që i kanosej personit që u dëbua?
A pati një gjykim të drejtë sipas ligjit apo jo?
Këto përgjigje priteshin nga Kryeministria, e jo “s’merremi me procedura”. Këtë të fundit e dimë shumë mirë.
/abcnews.a
