Selami: Nuk mund të kemi tre apo katër qëndrime të ndryshme për reformën në Drejtësi dhe byronë e hetimit…
Qëndrimi për Reformën në Drejtësi dhe Byronë kombëtare të hetimit ka shkaktuar debate të ashpra mes kryetarit të PD-së Lulzim Basha dhe deputetit të PD-së Eduard Salami. Në mbledhjen e sotme të grupit parlamentar, Eduard Selami ka kërkuar shpjegime nga kryetari Basha për ndryshimin e shpeshtë të qëndrimeve të PD-së për këto dy çështje, por kryesisht për byronë kombëtare të Hetimit. “Ne nuk mund te kemi tre ose 4 qëndrime të ndryshme për Reformën në Drejtësi e Byronë Kombëtare të Hetimit. Ndërkohë që ju nuk mund të deklaroni qëndrimin e PD-së për mediat pa e diskutuar në forumet e partisë dhe në grupin parlamentar. Çfarë kuptimi ka të diskutojmë tani në grup parlamentar ndërkohë që e lexove deklaratën në media?!” mësohet t’i ketë thënë Selami Bashës.
Reagimi i Selamit, erdhi pasi Basha deklaroi qëndrimin e PD-së në nisje të mbledhjes së grupit parlamentar të PD-së pa diskutuar në grup parlamentar.
Më pas Selami ka shprehur rezerva edhe për nisjen me vonesë të mbledhjes së grupit parlamentar. “Pse fillojmë gjithmonë me vonesë mbledhjen… pse duhet të presim gjithmonë me minuta e ndoshta me orë për të nisur mbledhja?”, është shprehur Selami. Debate për këto çështje ka patur edhe mes Bashës e deputetit Arben Imami, i cili ka shprehur rezerva kryesisht për qëndrimet e ndryshuara të PD-së për çështjet themelore dhe diskutime të munguara nëpër forume.
Basha nga ana e tij është mjaftuar të kujtojë që është në krye të detyrës.
