“Me paratë e narkomafias blihen lobingjet në Europë dhe Amerikë për t’i ardhur në ndihmë republikës së krimit”
“Komentet për markatën e peshkut merrini tek tregtarët e peshkut. Peshku është qelbur nga koka me kohë” . Ky ishte komenti i kryetarit të Partisë Demokratike, Lulzim Basha për darkën e zhvilluar mes Ramës dhe Metës mbrëmjen e djeshme tek “Pazari i Ri”.
Gjatë bashkëbisedimit në çadër me qytetarët për varfërinë Basha tha se nga Shqipëria janë larguar 200 mijë shqiptarë si pasojë e varfërisë.
Më tej lideri i opozitës tha se të gjithë po humbin me këtë qeveri, ku sipas tij janë mbyllur mesatarisht 27 mijë biznese vit për vit.
Ndërkohë kryedemokrati tha gjithashtu se me paratë e narkomafias po blihen lobingjet në Europë dhe Amerikë për t’i ardhur në ndihmë republikës së krimit.
Gjthashtu Basha akuzoi qeverinë për lidhje me krimin duke thënë: “Kjo është qeveri kriminelësh që do të bëjë gjithçka për të mbajtur pushtetin që ka me krimin. E vetmja garanci për fitoren e kësaj beteje epike është bashkimi dhe qëndresa deri në fitore. Me shpifje, mashtrime e presione do të bëjnë gjithçka për tërheqjen tonë, por unë garantoj se nuk tërhiqem nga kjo betejë pa zgjedhje të lira e të ndershme dhe qeveri teknike”.
