Komisioni i Etikës në FSHF nuk bën asnjëherë një punë të rëndësishme, ndërsa me një nga masat e pakta që mori edicionin e shkuar ka koleksionuar një gafë autentike. Një ndeshje midis Flamurtarit dhe Partizanit u konsiderua e trukuar dhe portjeri Ilion Lika i skuadrës vlonjate u dënua për gjashtë muaj. Çështja u mor në shqyrtim edhe nga Prokuroria e Durrësit, e cila ka mbyllur përfundimisht hetimet, në mungesë të elementëve që përbëjnë vepër penale. Në fakt, duheshin hapur hetime për çmendurinë e ardhur nga FSHF, pasi në atë ndeshje të përfolur, kapiteni Lika u zgjodh si kokë turku, sepse nuk ka qenë fare i grumbulluar. Presidenti i Flamurtarit, Sinan Idrizi, ka vendosur të hedhë në gjyq Federatën për prishje të imazhit, ndërsa Ilioni meriton të dëmshpërblehet, pasi e përbaltën, e lanë gjysmën e vitit jashtë fushave, aq sa mendoi të largohej përfundimisht nga futbolli i luajtur.
